श्रेया बुगडे आणि भाऊ कदम सोबत पायलट असलेली ही व्यक्ती आहे खास…

कलाकारांना काम करण्यासाठी नेहमी प्रवास करावा लागतो. या प्रवासात त्यांना त्यांचे अनेक अनुभव देणारे चाहते देखील भेटतात. आपल्या चाहत्यांनी केलेले कौतुक असो वा ओळख दाखवणे असो हे त्यांच्यासाठी नेहमीच भारावून जाणारे ठरत असते. मात्र भाऊ कदम आणि श्रेया बुगडेला इथे एक वेगळाच अनुभव आलेला पाहायला मिळाला आहे. हा अनुभव श्रेयाने तिच्या इन्स्टग्राम स्टोरीवर शेअर केला आहे. भाऊ कदम आणि श्रेया बुगडे हे दोघेही चला हवा येऊ द्या या शोचा महत्वाचा भाग आहेत. कामानिमित्त या दोघांनी नुकताच एक विमान प्रवास केला आहे. या प्रवासात त्यांना एक महिला पायलट भेटली जी मराठी चित्रपट सृष्टीशी निगडित आहे.

श्रेयाने आणि भाऊ कदमने या महिला पायलट सोबत एक फोटो काढला आणि तो सोशल मीडियावर शेअर केला. त्यांच्यासोबत असलेल्या महिला पायलटला पाहून अनेकांनी तिचे कौतुक केले कारण ही महिला पायलट होती इशानी आठल्ये. मराठी सृष्टीतील प्रसिद्ध अभिनेत्री अल्का कुबल आणि समीर आठल्ये यांची ती लेक. अल्का कुबल यांना श्रेयाने आपल्या स्टोरीमध्ये टॅग केले आणि ‘अल्का ताई पाहिलंत का, आमच्या विमानाची पायलट कोण आहे? इशानी आम्हाला तुझा खूप खूप अभिमान आहे.’ असे म्हणत श्रेयाने अल्का कुबल यांच्या लेकीचं तोंडभरून कौतुक केलं. काही महिन्यांपूर्वीच अल्का कुबल यांच्या लेकीचा म्हणजेच इशानीचा विवाहसोहळा पार पडला होता.

या लग्नाला मराठी सृष्टीतील अनेक कलाकारांनी हजेरी लावली होती. पायलट असलेल्या निशांत वालीयासोबत इशानीचे थाटात लग्न पार पडले होते. इशानीने २०१५ साली प्रोफेशनल पायलटचे प्रशिक्षण घेतले होते. भारतात येऊन तिने ही सेवा करण्याचे ठरवले होते. त्यामुळे ह्या प्रवासात इशानीसोबत गगनभरारी करायला श्रेया बुगडे तेवढीच उत्सुक असलेली पाहायला मिळाली. आपल्या विमानाची पायलट इशानी आहे हे कळल्यावर श्रेया आणि भाऊ कदमने तिची भेट घेतली आणि इशानीसोबत एक छानसा फोटो काढून तिने तो सोशल मीडियावर प्रसिद्ध केला. प्रवासात चाहत्यांकडून आश्चर्याचे धक्के नेहमीच भेटतात मात्र हा अनुभव खूप वेगळा होता असे श्रेया याबाबत म्हणते.