सिंधुताई सपकाळ यांच्या भूमिकेत दिसणार प्रसिद्ध अभिनेत्री.. योग्य अभिनेत्रीची निवड केल्याने प्रेक्षक खुश

कलर्स मराठीवरील सिंधुताई माझी माई ही मालिका प्रेक्षकांच्या पसंतीस उतरत आहे. मालिकेत बालकलाकार अनन्या टेकवडे हिने बालपणीच्या सिंधुताईंची भूमिका साकारली होती. प्रिया बेर्डे, योगिनी चौक, किरण माने यांनी या मालिकेत प्रमुख भूमिका साकारल्या आहेत. छोट्या सिंधुला अजून शिकायचे आहे मात्र आता तिची आजी आणि काका तिच्या लग्नाचा घाट घालत आहेत. सिंधूने शिकावं असा तिच्या वडिलांचा हट्ट आहे पण आता मालिकेत छोट्या सिंधुला बघायला पाहुणे मंडळी आली आहेत. त्यामुळे मालिकेत अतुल आगलावे याची प्रमुख भूमिकेसाठी एन्ट्री झाली आहे.

अतुल आगलावे सिंधुताईंच्या नवऱ्याची भूमिका साकारत आहे तर अभिनेत्री विद्या सावळे सासूच्या भूमिकेत दिसत आहे. मालिका आता अनेक वर्षांचा लीप घेत आहे. त्यामुळे अनन्याची मालिकेतून एक्झिट झाली आहे. त्यामुळे आता छोट्या चिंधीचा सिंधू बनण्याचा प्रवास प्रेक्षकांना अनुभवायला मिळत आहे. मालिकेत सिंधुताई सपकाळ यांची व्यक्तिरेखा साकारण्यासाठी अभिनेत्री शिवानी सोनारची निवड करण्यात आली आहे. मालिकेचा नवीन प्रोमो प्रेक्षकांच्या भेटीला आला होता त्यावेळी शिवानीचा चेहरा झाकलेला दाखवण्यात आला होता. त्यावेळी ही भूमिका कोण साकारणार याबद्दल उत्सुकता निर्माण झाली होती. मात्र आता ही भूमिका शिवानी सोनार साकारणार असल्याचे निश्चित झाले आहे. शिवानी सोनार हिने कलर्स मराठीवरील राजा राणीची गं जोडी ही मालिका गाजवली होती.

शिवानी एका अवॉर्ड सोहळ्यात अभिनेत्री रसिका सुनील सोबत सूत्रसंचालन करताना दिसली. त्यानंतर शिवानीची सिंधुताईंच्या भूमिकेसाठी निवड करण्यात आली आहे. त्यामुळे शिवानीच या भूमिकेसाठी योग्य आहे अशी प्रतिक्रिया प्रेक्षकांकडून देण्यात येत आहे. शिवानी सोनार हिने एकांकिका राज्य नाट्य स्पर्धांमध्ये सहभाग दर्शवला होता. राजा राणीची गं जोडी या मालिकेतून ती प्रथमच प्रमुख भूमिकेत झळकली होती. मालिकेतील संजीवनीची भूमिका तिने अभिनयाने चांगलीच गाजवली होती. आता सिंधुताईंची भूमिका शिवानी सकारतीये हे कळल्यावर प्रेक्षकांनी आनंद व्यक्त केला आहे. शिवानीच्या अभिनयाने सिंधुताईची व्यक्तिरेखा उत्तम साकारली जाईल असा विश्वास प्रेक्षकांनी व्यक्त केला आहे. या दमदार भूमिकेला शिवानी योग्य न्याय देईल असा विश्वास आहे.