ती परत आलीये मालिकेतील कलाकारांनी केला साखरपुडा.. एकत्र काम करताना जुळले प्रेम

झी मराठी वाहिनीवरील ‘ती परत आलीये’ ही मालिका अल्पावधीतच प्रेक्षकांच्या पसंतीस उतरली होती. मालिकेतील सस्पेन्स आणि त्यातील चित्त थरारक घटना प्रेक्षकांना एका जागेवर खिळवून ठेवताना दिसल्या होत्या. मात्र ही मालिका केवळ १०० भागांचीच असणार हे सांगितले जात होते. त्यानुसार या मालिकेने प्रेक्षकांचा लवकरच निरोप घेतलेला पाहायला मिळाला होता. बाबुराव, सायली, सतेज, अनुराग, विक्रांत, रोहिणी, अभय, हनम्या ही पात्र कलाकारांनी आपल्या सजग अभिनयातून प्रेक्षकांची दाद मिळवताना दिसली. या मालिकेत काम करत असताना कलाकारांमध्ये छान बॉंडिंग जुळून आलेले पाहायला मिळाले.

अगदी मालिका संपल्यानंतरही ही कलाकार मंडळी एकमेकांसोबत वेळ घालवताना दिसली. अशातच या कलाकारांची प्रेमकहाणी देखील फुललेली पाहायला मिळाली. मालिकेत रोहिणी प्रेग्नंन्ट असल्याचे दाखवले होते ही भूमिका तन्वी कुलकर्णी हिने निभावली होती. तर विक्रांतची भूमिका नचिकेत देवस्थळी याने साकारली होती. तन्वी कुलकर्णी आणि नचिकेत देवस्थळी या मालिकेत काम करत असताना दोघांची मैत्री झाली आणि या मैत्रीचे आता नात्यात रूपांतर झालेले पाहायला मिळत आहे. नुकतेच या दोघांनी साखरपुडा करून चाहत्यांना आश्चर्याचा धक्का दिला आहे. ‘हमसफर’ असे म्हणत तन्वी आणि नचिकेत यांनी साखरपुड्याचे खास फोटो शेअर केले आहेत.

यावर चाहत्यांनी आणि सेलिब्रिटींनी अभिनंदनाचा वर्षाव केला आहे. तन्वी कुलकर्णी हिने रंगभूमीपासून आपल्या अभिनयाच्या कारकिर्दीला सुरुवात केली. पुरुषोत्तम करंडक सारख्या अनेक नाट्यस्पर्धा तन्वीने गाजवल्या आहेत. स्वराज्यरक्षक संभाजी या लोकप्रिय मालिकेत तन्वीला सगुणाबाईंची भूमिका साकारण्याची संधी मिळाली. जुळता जुळता जुळतंय की, स्वराज्य जननी जिजामाता, ती परत आलीये अशा मालिकांमधून तन्वी झळकली आहे. अ ट्रायल बिफोर मॉन्सून या शॉर्टफिल्ममध्ये तन्वीला मोहन आगाशे यांच्यासोबत झळकण्याची संधी मिळाली. तर नचिकेत देवस्थळी हा देखील नाट्य, मालिका अभिनेता आहे.

सुखन या लोकप्रिय कार्यक्रमाचा तो एक महत्वाचा भाग बनला आहे. नाटक कंपनीच्या सतीश आळेकर लिखित आणि दिग्दर्शित ‘महानिर्वाण ‘ या नाटकातून नचिकेतने मध्यवर्ती भूमिका साकारली आहे. ती परत आलीये ही नचिकेतने अभिनित केलेली पहिलीच टीव्ही मालिका. यातही तो विक्रांतच्या महत्वपूर्ण भूमिकेत पाहायला मिळाला. मालिकेत एकत्रित काम करत असताना नचिकेत आणि तन्वीचे सूर जुळून आले आणि त्यांनी साखरपुडा करण्याचा निर्णय घेतला. आता हे दोघे लग्न कधी करणार याकडे चाहत्यांचे लक्ष लागून राहिले आहे. साखरपुड्या निमित्त नचिकेत देवस्थळी आणि तन्वी कुलकर्णी यांचे खूप खूप अभिनंदन.