लेक माझी दुर्गा मालिकेत धक्कादायक ट्विस्ट.. दुर्गाच्या भूमिकेत दिसणार ही अभिनेत्री

कलर्स मराठी वाहिनीवरील ‘लेक माझी दुर्गा’ या मालिकेला प्रेक्षकांकडून खूप चांगला प्रतिसाद मिळत आहे. काही दिवसांपूर्वीच या मालिकेने १०० भागांचा टप्पा यशस्वीपणे पार केला आहे. लेक माझी दुर्गा या मालिकेला हेमांगी कवी, सुशील इनामदार, नियती राजवाडे, आनंद काळे, सई रानडे, स्वप्नील पवार व मृणाल देशपांडे अशी भली मोठी स्टारकास्ट लाभली आहे. काही दिवसांपासून या मालिकेत दुर्गा आणि जयसिंगरावांची लगीनघाई पाहायला मिळत आहे. मात्र जयसिंग आणि दुर्गाचे लग्न होऊ नये म्हणून सरदेशमुख कुटुंब विरोधात असलेले पाहायला मिळाले. अशातच या दोघांनी मंदिरात जाऊन लग्न केले होते.

मात्र आता घरच्यांच्या संमतीने या दोघांच्या लग्नाचा सोहळा मोठ्या थाटात संपन्न होताना दिसत आहे. जयसिंगचे लग्न निशासोबत व्हावे अशी मनोरमाची ईच्छा असते. मात्र लेक माझी दुर्गा या मालिकेत धक्कादायक ट्विस्ट आलेला पाहायला मिळतो आहे. मालिकेत मनोरमा सरदेशमुख आपल्या लाडक्या सुनेचा चेहरा सगळ्यांना दाखवण्यासाठी चेहऱ्यावर ओढलेला पदर वर करते मात्र इथे दुर्गाला पाहून मनोरमा गोंधळून जाते. या ट्विस्टमुळे मनोरमा जरी गोधळलेली पाहायला मिळाली असली तरी, दुर्गाच्या भूमिकेत प्रेक्षकांना रश्मी अनपट पाहायला मिळाल्याने प्रेक्षकांनाच मोठा धक्का बसला आहे. मालिकेत याअगोदर दुर्गाची भूमिका वरदा पाटील हिने निभावली होती.

मात्र वरदाच्या जागी दुर्गाच्या भूमिकेसाठी आता रश्मी अनपट हिची वर्णी लागलेली पाहायला मिळत आहे. त्यामुळे वरदाने ही मालिका सोडली असल्याचे निश्चित करण्यात आले आहे. मालिकेतला हा ट्विस्ट प्रेक्षकांना ९ जून आणि १० जूनच्या भागात पाहायला मिळणार आहे. अर्थात दुर्गाचे जयसिंगसोबत लग्न झाल्याने दुर्गाच्या आयुष्यातला हा नवा अध्याय सुरू झालेला पाहायला मिळतो आहे. मात्र वरदाच्या जागी दुर्गाची भूमिका रश्मी अनपट निभावणार असल्याने प्रेक्षकांनी आश्चर्य व्यक्त केलं आहे. याअगोदर आई माझी काळूबाई या मालिकेत आर्याच्या भूमिकेसाठी रश्मीची वर्णी लागली होती. सुरुवातीला ही भूमिका प्राजक्ता गायकवाड हिने निभावली होती. मात्र मालिकेत झालेल्या वादामुळे तिने ही मालिका अर्ध्यावर सोडली.

प्राजक्ता नंतर आर्याच्या भूमिकेत वीणा जगताप पाहायला मिळाली. मात्र शूटिंगसाठी करावा लागणारा प्रवास यामुळे विणाने देखील ही मालिका अर्ध्यावर सोडली होती. त्यानंतर रश्मीने आर्याची भूमिका मालिकेच्या अखेरपर्यंत निभावली. या मालिकेनंतर रश्मी पुन्हा एकदा मुख्य भूमिकेतून प्रेक्षकांच्या भेटीला येत आहे. लेक माझी दुर्गा मालिकेत तिला दुर्गाची मध्यवर्ती भूमिका मिळाल्याने रश्मीचे चाहते प्रचंड खुश झाले आहेत. आता लग्नानंतर जयसिंग सोबतचा दुर्गाचा प्रवास कसा असेल याची उत्सुकता मालिकेतून निर्माण होते. मात्र वरदा पाटीलने ही मालिका का सोडली असावी? असा मोठा प्रश्न तिच्या चाहत्यांना तसेच प्रेक्षकांना पडला आहे. तूर्तास रश्मी अनपट हिला दुर्गाच्या भूमिकेसाठी खूप खूप शुभेच्छा.