ललित प्रभाकरचा तो फोटो चर्चेत.. मिस्ट्री गर्लचं कोडं उलगडलं

ललित प्रभाकर हा मराठी सृष्टीतील हरहुन्नरी अभिनेता म्हणून ओळखला जातो. झोंबिवली, सनी, टर्री असे एकापाठोपाठ एक येणारे त्याचे चित्रपट प्रेक्षकांनी आपलेसे केलेले पाहायला मिळाले. जुळून येती रेशीमगाठी मालिकेमुळे ललित​​ प्रेक्षकांच्या घराघरात पोहोचला होता. इतके दिवस इंडस्ट्रीत काम करून ललीतचे नाव कोणत्याही अभिनेत्रीसोबत जोडले गेले नाही हे विशेष म्हणावं लागेल. कारण एवढ्या हँडसम नायकाशी लग्न करायला कोणीच कसं तयार नाही असा प्रश्न अनेकांना पडला आहे. मात्र नुकतेच ललीतने एक खास फोटो टाकला. पाठमोऱ्या उभ्या असलेल्या एका मुलीसोबतचा फोटोमुळे ललित कोणाच्या प्रेमात पडला आहे का असा प्रश्न त्याच्या चाहत्यांना पडला.

त्यानंतर ललितने असाच आणखी एक फोटो टाकत बिग न्यूज असे कॅप्शन दिले. ललित सोबत असणारी ही मिस्ट्री गर्ल कोण यावर चर्चा सुरू असतानाच ललीतने आता आणखी एक मोठी घोषणा केलेली पहायला मिळत आहे. खिल्लार हा ललितचा आगामी चित्रपट आहे. या चित्रपटाचे मोशन पोस्टर नुकतेच प्रकाशित करण्यात आले आहे. मकरंद माने हे चित्रपटाचे लेखक आणि दिग्दर्शक आहेत. महाराष्ट्र दिनाचे औचित्य साधून त्यांनी चित्रपटाची घोषणा केली आहे. ललित प्रभाकर चित्रपटाचा नायक असून त्याची नायिका असणार आहे सैराट फेम रिंकू राजगुरू. रिंकू सोबतच ललीतने ते फोटो टाकून आपल्या आगामी चित्रपटनिमित्त चाहत्यांचे लक्ष वेधून घेतले होते. ही मिस्ट्री गर्ल कोण याचा उलगडा करत रिंकू सोबत त्याने एक छानशा फोटोसोबत चित्रपटाची बातमी दिली आहे.

रिंकू आणि ललित या दोघांची जोडी प्रथमच यानिमित्ताने एकत्र काम करताना दिसणार आहे. खिल्लार चित्रपट बैलगाडा शर्यतीवर आधारित असणार आहे, त्यामुळे या चित्रपटाला गावरान बाज असणार आहे. रिंकू आणि ललित या भूमिकेसाठी योग्य ठरतील असा विश्वास प्रेक्षकांनी देखील व्यक्त केला असून त्यानिमित्त दोघांना शुभेच्छा दिल्या जात आहेत. खिल्लार चित्रपटांमधून रिंकू राजगुरू पुन्हा एकदा दमदार भूमिकेत झळकणार असे बोलले जात आहे. सैराट हा तिच्या पदार्पणातला चित्रपट मैलाचा दगड ठरला होता. त्यानंतर रिंकूने अनेक चित्रपट केले पण त्यात म्हणावी तशी प्रसिद्धी मिळत नव्हती. पुन्हा एकदा तशा धाटणीची भूमिका तिला मिळावी अशी अपेक्षा असतानाच आता खिल्लार हा एका वेगळ्या धाटणीचा चित्रपट तिच्याकडे आला आहे. या चित्रपटाची घोषणा करताच तिच्याकडून भरपूर अपेक्षा व्यक्त केल्या जात आहेत.