हे मन बावरे मालिकेतील अभिनेत्रीच्या घरी लवकरच होणार चिमुकल्या पावलांचे आगमन..

कलर्स मराठीवरील हे मन बावरे ही लोकप्रिय मालिका बहुतेक प्रेक्षकांना आठवत असेल. या मालिकेत मृणाल दुसानिस, शशांक केतकर, नयना आपटे, विदिशा म्हसकर, संग्राम समेळ, आशा शेलार, शर्मिष्ठा राऊत. सायली परब, वंदना गुप्ते, माधवी जुवेकर, तृष्णा चंद्रात्रे असे बरेचसे जाणते कलाकार झळकले होते. या मालिकेतील लोकप्रिय अभिनेत्रीने लवकरच आई बनणार असल्याची एक गोड बातमी सोशल मीडियावर शेअर केली आहे. मृणाल दुसानिस नंतर आता ही गोड बातमी देणारी अभिनेत्री आहे सायली परब शेलार. हे मन बावरे या मालिकेत सायलीने मृणाल दुसानिसच्या मैत्रिणीची म्हणजेच नेहाची भूमिका साकारली होती.

नेहाच्या भूमिकेने सायली प्रेक्षकांच्या विशेष पसंतीस उतरली होती. अनुला नेहमी मदत करणारी नेहा मुख्य नायिकेईतकीच भाव खाऊन जाताना दिसली होती. त्यामुळे नेहाची लोकप्रियता वाढताना दिसली. काही महिन्यांपूर्वीच मृणाल दुसानिसला कन्यारत्न प्राप्ती झाली तिच्या पाठोपाठ तिची खास मैत्रीण सायलीने देखील ही आनंदाची बातमी सोशल मीडियावर शेअर केली आहे. रामनारायण रुईया कॉलेजमध्ये शिकत असताना सायली नाटकांमधून सक्रिय होती. नाट्यस्पर्धा गाजवत असतानाच झी मराठीवरील चूक भूल द्यावी घ्यावी या मालिकेतून तिला अभिनयाची संधी मिळाली. हुतात्मा या वेबसिरीजमध्ये सायली एका महत्त्वाच्या भूमिकेत दिसली.

१ फेब्रुवारी २०२० रोजी सायलीने तिचा खास मित्र आणि फोटोग्राफर असलेल्या इंद्रनील शेलार सोबत लग्न करून आपला संसार थाटला. मधल्या काळात तिने सोनी मराठी वाहिनीवरील तू सौभाग्यवती हो या मालिकेत काम केले. अभिनय क्षेत्रातून काही काळ ब्रेक घेत सायली आता आपल्या सुखी संसाराची स्वप्न अनुभवताना दिसत आहे. एक नवीन सुरुवात असे कॅप्शन देऊन सायलीने डोहाळजेवणाचे फोटो शेअर केले आहेत. तिच्या या फोटोंवर मराठी विश्वातील अनेक कलाकारांनी अभिनंदनाचा वर्षाव केला आहे. मृणाल दुसानिस, अक्षया नाईक, माधुरी गवळी, ऋतुजा बागवे, भक्ती देसाई, स्नेहल शिदम यांनी अभिनंदनाचा वर्षाव करत सायलीला विशेष काळजी घेण्यास सांगितले आहे.