तुझ्यात जीव रंगला नंतर अक्षया हार्दिक झळकणार चित्रपटात

झी मराठी वाहिनीने नेहमीच नवख्या कलाकारांना अभिनयाची संधी मिळवून दिली आहे. हार्दिक जोशी आणि अक्षया देवधर यांना तुझ्यात जीव रंगला मालिकेत प्रमुख भूमिका साकारण्याची संधी मिळाली. मालिकेतील राणा आणि पाठक बाईची जोडी प्रेक्षकांना विशेष भावली. मालिकेतील रील लाईफ कपल रिअल लाईफमध्ये लवकरच विवाहबद्ध होत आहेत. काही महिन्यांपूर्वीच या दोघांनी गुपचूप साखरपुडा केला होता. आता हे दोघेही लवकरच लग्न करणार असेही त्यांनी जाहीर केले होते. मात्र त्याअगोदर ही जोडी पुन्हा एकदा मोठा पडदा गाजवताना दिसणार आहे. एका आगामी प्रोजेक्ट निमित्त हे दोघेही लंडनला रवाना झाले आहेत.

हार्दिक आणि अक्षया या मालिके अगोदर चित्रपट, नाटकांमधून छोट्या मोठ्या भूमिका साकारताना दिसले. मालिकेनंतरही या दोघांना झी मराठी वाहिनीने पुन्हा एकदा काम करण्याची संधी मिळवून दिली. आता हे दोघेही ‘फाईल नंबर ४९८ अ’ या आगामी चित्रपटातून प्रथमच मोठ्या पडद्यावर प्रेक्षकांच्या भेटीला येत आहेत. मनीष हर्षा मुव्हीज प्रस्तुत चित्रपटाची निर्मिती आरती श्रीधर तावरे यांची आहे. चित्रपटाचे दिग्दर्शन मल्हार गणेश यांनी केले आहे. शूटिंगला सुरुवात झाली असून येत्या काही दिवसातच प्रदर्शनाची तारीख जाहीर केली जाईल. या चित्रपटात हार्दिक आणि अक्षया मुख्य भूमिकेत दिसणार आहेत. चित्रपटाचे कथानक श्रीधर तावरे आणि आशिष निनगुणकर यांची आहे.

एका घटनेमुळे एक तरुण कायद्याच्या कचाट्यात कसा भरडला जातो याची ही कथा आहे. या चित्रपटात आणखी कोणकोणते कलाकार झळकणार आहेत हे लवकरच समोर येईल. मागील काही दिवसांपासून हार्दिक, अक्षया आणि नितीश चव्हाण ट्रीपच्या निमित्ताने लंडनला रवाना झाले होते. लंडन ब्रिजवरील या तिघांचे एकत्रित रिल्स सोशल मीडियावर चांगलेच व्हायरल झाले होते. यावरून प्रसार माध्यमातून हार्दिक आणि अक्षयामध्ये जोरदार भांडण झाले असेही म्हटले गेले. या तिघांसोबत आशय कुलकर्णी, दीप्ती देवी हे देखील पाहायला मिळाले. त्यामुळे अक्षया हार्दिक लग्नाअगोदर ट्रिप एन्जॉय करत नसून ते प्रोजेक्टसाठीच गेले असल्याचे स्पष्ट झाले आहे. या आगामी चित्रपटासाठी हार्दिक आणि अक्षया तसेच सहकलाकरांना खूप खूप शुभेच्छा.​​