मराठी बिग बॉसमधील दादूसने हळदीच्या कार्यक्रमात केला हवेत गोळीबार

मराठी बिग बॉसच्या घरात दादूसने प्रेक्षकांची मनं जिंकून घेतली होती. संतोष चौधरी हे त्यांचं खरं नाव असल तरी दादूस म्हणूनच त्यांना मोठी प्रसिद्धी मिळाली आहे. संतोष चौधरी आज एका वेगळ्याच कारणामुळे चर्चेत आले आहेत. संतोष चौधरी यांचा ऑर्केस्ट्रा आहे. सध्या सगळीकडे लग्नाची धामधूम सुरू आहे. कॉमेडीची बुलेट ट्रेन फेम वादक सचिन भांगरे याच्या लग्नाचा बार लवकरच उडणार आहे. त्याच्या हळदीच्या कार्यक्रमात संतोष चौधरीने हवेत गोळीबार केलेला पाहायला मिळाला. यामुळे संतोषला आता पोलिसांकडून ताब्यात घेण्यात येईल असे म्हटले जात आहे. सचिन भांगरे याचा हळदीचा सोहळा पार पडला यावेळी त्याने संतोषला गाणी गाण्यासाठी बोलावले होते.

हळदी सोहळ्यात गाणी गात असताना संतोषने त्याच्या जवळ असलेल्या पिस्तुलाने हवेत गोळीबार केला. हा व्हिडीओ सोशल मीडियावर व्हायरल होताच पोलिसांनी संतोषच्या कृत्याची दखल घेतलेली पाहायला मिळाली. हा व्हिडीओ आरेके मार्ग येथील असल्याचे पोलिसांना कळले त्यानुसार मुंबई पोलिसांनी सचिन भांगरे याच्या घरी धाव घेतली. पण लग्नानिमित्ताने नवरदेव आणि त्याचे कुटुंबीय घरी नसल्याचे समजले. दरम्यान पोलीस दादुसला चौकशीसाठी ताब्यात घेणार असल्याचे म्हटले जाते. दादुसजवळ असलेली पिस्तुल कोणाची होती याचीही चौकशी केली जाणार आहे. त्यामुळे दादूस आता मोठ्या अडचणीत सापडले आहेत. मराठी बिग बॉसच्या घरात येण्या अगोदर दादूस आपल्या आगरी कोळी गीताने प्रेक्षकांच्या मनात घर करून होते.

मराठी बिग बॉसने त्यांना मोठी प्रसिद्धी मिळवून दिली. जय दुधाने, अक्षय वाघमारे, शिवलीला पाटील, उत्कर्ष शिंदे, मीनल पाटील, अविष्कार दारवेकर, सुरेखा कुडची यांच्यासोबत सिझन ३ मध्ये सहभाग नोंदविला होता. विशाल निकम आणि जय दुधाने यांच्यात शेवटचा निर्णय ठरणार होता. ज्यात विशाल निकमला विनर घोषित करण्यात आले होते. दादुस गेली अनेक वर्षे कोळी गीतांचे अल्बम तसेच ऑर्केस्ट्रामध्ये गातात. लग्नाच्या सीजनमध्ये त्यांना गाण्यासाठी आमंत्रित करण्यात येते. कॉमेडीची बुलेट ट्रेन मुळे प्रसिद्धीस आलेल्या सचिन भांगरे याचे नुकतेच लग्न जुळले होते. त्याच्या हळदीच्या कार्यक्रमासाठी त्याने दादूसला आमंत्रण दिले होते. त्यावेळी हवेत गोळीबार करतानाचा त्याचा व्हिडीओ पोलिसांच्या नजरेस पडला असल्याने हे दोघेही सध्या अडचणीत सापडले आहेत.