​नवीन मालिकेचा प्रोमो प्रेक्षकांच्या पसंतीस.. वेगळा विषय आणल्याने प्रेक्षकांनी केलं कौतूक

स्टार प्रवाह, झी मराठी, कलर्स मराठी अशा एकापेक्षा एक सरस ठरलेल्या वाहिनीच्या तुलनेत सोनी मराठी वाहिनीला प्रेक्षकांकडून कमी प्रतिसाद मिळत आला आहे. मात्र आपलं वेगळेपण जपण्यासाठी ही वाहिनी सतत नाविन्याचा शोध घेण्याचा प्रयत्न करताना दिसत आहे. जीवाची होतीया काहिली या मालिकेला देखील कोल्हापुरी आणि दाक्षिणात्य बाज पाहायला मिळतो आहे. रेवथी आणि अर्जुनची जुळून आलेली केमिस्ट्री प्रेक्षकांच्या पसंतीस उतरत आहे. बॉस माझी लाडाची, सुंदर आमचे घर, आणि आता लवकरच येऊ घातलेल्या ‘छोट्या बयोची मोठ्ठी स्वप्नं’ प्रेक्षकांच्या पसंतीस उतरत आहेत. छोट्या बयोची मोठ्ठी स्वप्नं या मालिकेतील बयोला शिक्षणाची भारी हौस.

मोठं होऊन तिला डॉक्टर बनायचं असतं. ही बयो जिथे असेल तिथे पुस्तक वाचताना दिसते आणि मित्रांना देखील अभ्यासात मदत करते. त्यामुळे एका वेगळ्या विषयाला हात घालून वाहिनीने नवीन आदर्श प्रेक्षकांच्या समोर ठेवला आहे. मुलांमध्ये शिक्षणाची गोडी निर्माण व्हावी याच उद्देशाने ही मालिका बनवण्याचा निर्णय घेण्यात आला असल्याने वाहिनीचे कौतुक करण्यात येत आहे. अभिनेत्री वीणा जामकर छोट्या पडद्यावर पुनरागमन करत आहे तर विक्रम गायकवाड, नचिकेत पूर्णपात्रे, बालकलाकार रुची अशी बरीचशी कलाकार मंडळी या मालिकेत झळकणार आहेत. बालकलाकार रुची बयोच्या भूमिकेत दिसणार असून खडतर परिस्थितीत शिक्षणाच्या जिद्दीचा प्रवास ती आपल्या सहजसुंदर अभिनयाने वठवताना दिसणार आहे.

मालिकेतील बयोची खास डिझाइन केलेली सायकल देखील प्रेक्षकांना खूपच आवडली आहे. पुस्तकं वाचण्याची आवड असल्याने बयोच्या सायकलच्या मागे खास कप्पे बनवले आहेत. या कप्प्यामध्ये ती तिची पुस्तकं ठेवते. विणा जामकर बयोच्या आईची भूमिका साकारत आहे. विणाने आजवर मराठी चित्रपटातून वेगवेगळ्या धाटणीच्या भूमिका साकारल्या आहेत. सशक्त अभिनेत्री अशीही तिची ओळख आहे, तर विक्रम गायकवाड डॉक्टरच्या भूमिकेत आहे. बयोला डॉक्टर होण्यासाठी तोही तिची नेहमी मदत करताना दिसणार आहे. तर नचिकेत पूर्णपात्रे हा बयोच्या मामाची भूमिका साकारताना दिसणार आहे. नचिकेतने आजवर विविध धाटणीच्या भूमिका साकारल्या आहेत.

या मालिकेत तो सकारात्मक भूमिकेत दिसणार आहे. बयोला आपल्या सायकलवरून घेऊन जाणारा हा मामा तिच्या या प्रवासात महत्वाची भूमिका बजावणार आहे. त्यामुळे छोट्या बयोची मोठ्ठी स्वप्नं ही नवी मालिका प्रेक्षकांच्या पसंतीस नक्की उतरणार याची खात्री आहे. या मालिकेत आणखी कोणकोणते कलाकार झळकणार आहेत हे येत्या काही दिवसातच स्पष्ट होईल. पहिल्या प्रोमोनंतर मालिकेचा दुसरा प्रोमो नुकताच प्रेक्षकांच्या भेटीला आला आहे. मात्र मालिकेच्या प्रसारणाची तारीख आणि वेळ वाहिनीने जाहीर केलेली नाही. त्यामुळे सोनी मराठी वरील कोणती मालिका प्रेक्षकांचा निरोप घेणार आहे हे अजून तरी गुलदस्त्यात आहे.