बाईपण भारी देवा.. केदार शिंदे दिग्दर्शित चित्रपटात झळकणारी ही अभिनेत्री नक्की आहे तरी कोण?

​दिग्दर्शक केदार शिंदे यांनी आजवर अनेक दर्जेदार चित्रपट, नाटक आणि मालिका प्रेक्षकांसमोर आणल्या आहेत. अशीच एक सुंदर कलाकृती घेऊन ते लवकरच प्रेक्षकांच्या भेटीला येणार आहेत. येणाऱ्या न​​वीन वर्षात म्हणजेच २८ जानेवारी २०२२ रोजी केदार शिंदे दिग्दर्शित “बाईपण भारी देवा” हा चित्रपट प्रदर्शित होणार आहे. या चित्रपटाचे पोस्टर नुकतेच लॉन्च करण्यात आले ज्यात पाठमोरी नटून थटून उभी असलेली नायिका पाहायला मिळत आहे.

याअगोदर हा चित्रपट २८ मे २०२१ रोजीच प्रदर्शित होणार असल्याचे जाहीर करण्यात आले होते मात्र ही तारीख पुढे ढकलण्यात आली आणि आता २८ जानेवारी रोजी हा चित्रपट प्रदर्शित होणार असल्याचा शिक्कामोर्तब केलेला पाहायला मिळत आहे. या चित्रपटात कोण कोणते कलाकार झळकणार हे अजूनही जाहीर केले नसले तरी मुख्य नायिकेची भूमिका कोण साकारणार आहे ह्याचा उलगडा झाला आहे. चित्रपटाच्या पोस्टवर झळकणारी पाठमोरी नायिका आहे “उर्मिला झगडे”. उर्मिला झगडे ही नाट्य अभिनेत्री आहे. बाईपण भारी देवा हा तिचा प्रमुख भूमिका असलेला पहिला चित्रपट ठरणार आहे. या चित्रपटाच्या माध्यमातून उर्मिला झगडे प्रथमच मोठ्या पडद्यावर झळकणार आहे त्यामुळे तिच्यासाठी हा चित्रपट खूपच खास ठरणार आहे. उर्मिला झगडे हिने रुईया कॉलेजमधून आपले शिक्षण घेतले असून विविध नाटकांतून तिने भूमिका साकारलेल्या पाहायला मिळतात. शाळा आणि कॉलेजमध्ये असताना तिने सांस्कृतिक कार्यक्रमात सहभागी दर्शवला होता. “सखाराम ते समाज व्हाया तेंडुलकर” थेस्पोच्या अंतिम फेरीत उर्मिला झगडे आणि तिच्या टीमने उत्तम सादरीकरण केलं होतं. सही रे सही लोकप्रिय झाल्यानंतर केदार शिंदे यांनी भरत जाधवला घेऊन पुन्हा सही रे सही हे नाटक प्रेक्षकांसमोर आणलं.

या नाटकातून उर्मिलाला महत्वाची भूमिका साकारण्याची संधी मिळाली. हे नाटक महाराष्ट्रातच नव्हे तर परदेशात देखील तुफान लोकप्रियता मिळवताना दिसलं होतं. ऐश्वर्या ब्युटी पार्लर हे आणखी एक नाटक उर्मिलाने साकारलं. शर्वाणी पिल्लई, वर्षा दांदळे, शुभा गोडबोले या कलाकारांसोबत तिला या नाटकात महत्वाची भूमिका साकारण्याची संधी मिळाली होती. “बाईपण भारी देवा” या चित्रपटाचे पोस्टर लॉन्च होताच ह्या चित्रपटाबद्दल आणखी काय खास पाहायला मिळणार याची उत्सुकता प्रेक्षकांच्या मनात निर्माण झाली आहे. कुठल्याही निवडणुका जाहीर होण्याआधी आमची तारीख जाहीर! असे म्हणत केदार शिंदे यांनी त्यांच्या बाईपण भारी देवा या चित्रपटाच्या प्रदर्शनाची तारीख जाहीर केली आहे. या चित्रपटात उर्मिला सोबत आणखी कोणकोणते कलाकार झळकणार हे येत्या काही दिवसातच स्पष्ट होईल, तूर्तास उर्मिला झगडे हिला तिच्या पहिल्या वहिल्या चित्रपटासाठी भरभरून शुभेच्छा.