या क्षणाचीच तर वाट बघत होते.. डान्समधील देवी सोबत अमृताला मिळाली संधी

​प्रत्येक माणसाच्या आयुष्यात त्याचे आदर्श असतात​, एखाद्या व्यक्तीचा प्रभाव असतो. आणि जेव्हा त्याच व्यक्तीसोबत कौशल्य दाखवण्याची वेळ येते ती संधी आयुष्यातील अविस्मरणीय क्षण असतो. असच काहीसं झालं आहे अभिनेत्री अमृता खानविलकर​ ​सोबत. अमृताचं पहिलं प्रेम आहे ते डान्स आणि या क्षेत्रातील तिची आवडती व्यक्ती आहे अभिनेत्री माधुरी दीक्षित. माधुरी सोबत डान्स करायला मिळावा हे स्वप्नं पाहणाऱ्या अमृताच्या आयुष्यात हा क्षण आला आणि तिच्या आनंदाला आकाश मिळालं. अमृताने तिच्या इन्स्टापेजवर माधुरीसोबतचा व्हिडिओ शेअर करत या क्षणाचीच तर वाट बघत होतं या शब्दात भावना व्यक्त केल्या आहेत. लवकरच कलर्स वाहिनी झलक दिखला जा हा शो घेऊन येणार आहे.

सप्टेंबरच्या पहिल्या आठवड्यात हा शो छोट्या पडदयावर दाखल होणार आहे. या शोमुळे डान्सर होण्याचं स्वप्न पाहणाऱ्या कित्येकांना मंच मिळाला. पाच वर्षांच्या विश्रांतीनंतर झलक दिखला जा शोची दणक्यात सुरूवात होणार आहे. या शोची तयारी सध्या जोरात सुरू आहे. या शोच्या प्रोमोचं शूट सुरू झालं असून माधुरी दीक्षित आणि अमृता खानविलकर यांच्यावर हा प्रोमो शूट करण्यात आला आहे. याच निमित्ताने अमृताने माधुरीसोबत शूट करण्यासाठी जाताना तिची उत्सुकता चाहत्यांशी शेअर केली आहे. अमृताने माधुरीसोबतचा फोटो आणि तिच्यासोबतच्या डान्स स्टेप शेअर केल्या आहेत. यामध्ये अमृतानं असं लिहिलं आहे की, आजचा दिवस माझ्यासाठी खूपच आठवणीत राहील असा आहे. मी डान्सवर पहिलं प्रेम करते.

या डान्समधील देवी जिला मानते त्या माधुरी दीक्षित सोबत डान्स करण्याची संधी मला मिळाली आहे. ​​गणेशोत्सवात डान्स करणारी एक छोटी मुलगी ते आज सिनेमाक्षेत्रात ओळख मिळवणारी अमृता खानविलकर या माझ्या प्रवासात माधुरी दीक्षित हे नाव कायम माझ्या सोबत होतं. या व्हिडिओमध्ये अमृता खानविलकर नऊवारी साडी, नथ अशा मऱ्हाठमोळ्या रूपात दिसत आहे. तिच्यासोबत माधुरी दीक्षित गुलाबी रंगाच्या साडीत खुलून दिसत आहे. अमृताचा चंद्रमुखी हा सिनेमा हिट झाला होता. या सिनेमात अमृताने डान्स आणि अभिनय यांचा संगम घडवत चाहत्यांच्या मनावर राज्य केलं. पण अमृताच्या मनावर राज्य करणाऱ्या माधुरी दीक्षितची सोबत आणि डान्स हे तिचं पहिलं प्रेम एकत्र भेटल्याचा आनंद अमृतासाठी खूपच मोलाचा आहे.