kalakar Marathi, Hindi Cinema and Tv Entertainment, News
झी मराठीवरील तेजपाल वाघ यांच्या बऱ्याचशा मालिकांना प्रेक्षकांनी पसंती दर्शवली आहे. लागीरं झालं जी या मालिकेनंतर तेजपाल वाघ यांनी कारभारी लयभारी ही मालिका प्रेक्षकांच्या भेटीला आणली. राजकारणी व्यक्तीच्या आयुष्यावर भाष्य करणारी मालिका जवळपास एक वर्षाहून अधिक काळ प्रेक्षकांचे मनोरंजन करत राहिली. या मालिकेत निखिल चव्हाण आणि अनुष्का सरकटे यांनी प्रमुख भूमिका साकारल्या होत्या. यात खलनायिका म्हणून शोना मॅडमचे पात्र खूप गाजले होते. ही भूमिका साकारणाऱ्या अभिनेत्रीने थाटात साखरपुडा केला असल्याने सेलिब्रिटी आणि चाहत्यांकडून अभिनंदनाचा वर्षाव होत आहे. मालिकेत शोना मॅडमची भूमिका अभिनेत्री रश्मी पाटील हिने साकारली होती.
रश्मी पाटील ही मूळची पुण्याची, तिचं खरं नाव आहे रश्मी येसुगडे पाटील. रश्मीला शाळेत असल्यापासूनच नृत्याची विशेष आवड होती. खूप वर्षांपूर्वी रश्मीच्या वडिलांचे निधन झाले होते. रश्मी आणि तिच्या भावाच्या पालनपोषणाची जबाबदारी आईने खंबीरपणे पेलली. रश्मीचा भाऊ अभिषेकचा म्युजिक बँड आहे. त्यामुळे दोघेही भाऊ बहीण कला क्षेत्राशी निगडित आहेत. कॉलेजमध्ये असताना रश्मीला मॉडेलिंगचे वेध लागले. नामवंत रिऍलिटी शोमध्ये मॉडेल म्हणून सहभागी झाल्यावर तिला गाण्यात झळकण्याची संधी मिळाली. रश्मी पाटील कारभारी लयभारी मालिकेमुळे प्रसिद्धीच्या झोतात आली. तिने साकारलेली शोना मॅडमचा प्रेक्षकांना राग येत असे. मालिकेचा शेवट सकारात्मक दाखवल्यानंतर शोनाची देखील नायिकेने चांगलीच कानउघडणी केली होती.
कारभारी लयभारी मालिकेनंतर रश्मीने पुण्यात वाघोली येथे स्वतःची ऍक्टिंग अकॅडमी सुरू केली. आजवर या अकॅडमीतून अनेक नवख्या कलाकारांना तिने अभिनयाचे बारकावे शिकवले आहेत. अशातच रश्मीने आपल्या खास नातेवाईकांसमवेत अक्षय सोबत साखरपुडा केला आहे. अक्षय सोबत काही खास फोटो रश्मीने इन्स्टाग्रामवर शेअर केले आहेत. तिच्या या फोटोंवर अभिनंदनाचा पाऊस पडत आहे. कारभारी लयभारी मालिकेच्या कलाकारांना देखील रश्मीच्या अचानक झालेल्या साखरपुड्याने सुखद धक्का बसला आहे. त्यामुळे रश्मी आणि अक्षयच्या लग्नाची उत्सुकता आता तिच्या चाहत्यांना लागून राहिली आहे. सध्या रश्मीचा होणारा नवरा अक्षय कोण आहे याबाबत तीने अजूनही जाहीर केलेले नाही. तरी अक्षयला पाहून अनेकांनी छान प्रतिक्रिया देण्यास सुरुवात केली आहे.
