​नकुशी ​मालिकेतील या प्रसिद्ध अभिनेत्रीचे थाटात पार पडले लग्न

नकुशी या मालिकेतून प्रेक्षकांच्या घराघरात पोहोचलेली अभिनेत्री प्रसिद्धी किशोर हिचा नुकताच विवाह संपन्न झाला. ५ फेब्रुवारी रोजी मोठ्या थाटात प्रसिद्धी किशोर आणि ओंकार वर्तक यांचा विवाहसोहळा पार पडला. लग्न सोहळ्याचे खास फोटो तिने नुकतेच फेसबुक आणि इन्स्टाग्राम अकाउंटवर शेअर केले आहेत. प्रसिद्धी किशोर आयलवार ही मूळची नागपूरची. तिचे आजोबा गजानन आयलवार हे संगीताचे प्राध्यापक म्हणून ओळखले जातात. तिचे काका सुधीर आयलवार हे देखील कलाक्षेत्रात कार्यरत आहेत. रंगस्वानंद या संस्थेची निर्मिती त्यांनी केली होती. तर प्रसिद्धीचे वडील किशोर आयलवार हे देखील नाट्यअभिनेते म्हणून ओळखले जातात.

आजोबा, वडील, काका या तीघांच्या प्रोत्साहनामुळे प्रसिद्धीला देखील अभिनयाची गोडी निर्माण झाली. लहानपणापासूनच प्रसिद्धीने सांस्कृतिक कार्यक्रमातून सहभाग दर्शवला होता. पुढे पुण्यातील ललित कला केंद्र मधून तिने अभिनयाचे बारकावे शिकले. प्रसिद्धीला नृत्याची देखील विशेष आवड होती त्यासाठी भरतनाट्यमचे प्रशिक्षण तिने घेतले होते. ते दोन दिवस या चित्रपटातून तिला पहिल्यांदा मराठी चित्रपटात झळकण्याची संधी मिळाली होती. स्टार प्रवाह वरील नकुशी या मालिकेतून प्रसिद्धी प्रेक्षकांच्या घराघरात पोहोचली होती. या मालिकेत तिने नकुशीचे पात्र साकारले होते. आमच्या हीचं प्रकरण हे नाटक देखील खूप लोकप्रिय ठरलं या नाटकात प्रसिद्धीने महत्वाची भूमिका साकारलेली पाहायला मिळाली.

याशिवाय आम्ही दोघी या मालिकेतून प्रसिद्धीला मधुराची भूमिका साकारण्याची संधी  मिळाली होती. ही भूमिका अगोदर शिवानी रांगोळे हिने तिच्या अभिनयाने खुलवली होती, मात्र काही कारणास्तव शिवाणीने मालिका ही मालिका सोडली होती. त्यामुळे प्रसिद्धीसाठी ही भूमिका तितकीच आव्हानात्मक ठरलेली पाहायला मिळाली. आम्ही दोघी या मालिकेतून दोन भिन्न स्वभावाच्या बहिणी मीरा आणि मधुरा प्रेक्षकांना खूप भावल्या होत्या. लक्ष्मी सदैव मंगलम या आणखी एका मालिकेतून प्रसिद्धी झळकली होती. मालिका चित्रपट आणि नाटक अशा तिन्ही क्षेत्रात प्रसिद्धी झळकली आहे.

गेल्या वर्षी ओंकार वर्तकसोबत साखरपुडा झाल्यानंतर ती लवकरच लग्न करणार असे बोलले जात होते. मात्र लग्नाची तारीख तिने जाहीर करण्याचे टाळले होते. ५ फेब्रुवारी रोजी मोठ्या थाटात तिचा विवाहसोहळा पार पडला असून, ती ओंकार वर्तक सोबत दुबईत स्थायिक होईल असे बोलले जात आहे. कारण ओंकार वर्तक सध्या दुबईमध्ये कार्यरत आहे. लग्नानिमित्त प्रसिद्धी किशोर आणि ओंकार वर्तक नवदाम्पत्यांचे मनपूर्वक अभिनंदन आणि भावी आयुष्यासाठी शुभेच्छा.