या लोकप्रिय मराठी अभिनेत्रीने दिली गुड न्यूज.. चिमुकल्या पावलांचे होणार आगमन

मराठी चित्रपट तसेच मालिका अभिनेत्री मृणाल दुसानिस लवकरच आई होणार आहे. ही आनंदाची बातमी तिने तिच्या सोशल अकौंटवरून शेअर केली आहे. तिच्या या बातमीवर जुई गडकरी, श्रेया बुगडे, अक्षया गुरव, अभिज्ञा भावे तसेच अनेक सेलिब्रिटींनी अभिनंदनाचा वर्षाव केलेला पाहायला मिळतो आहे. हे मन बावरे या मालिकेनंतर मृणाल दुसानिस तिच्या नवऱ्यासोबत अमेरिकेत वास्तव्यास आहे. २०१५ साली मृणाल दुसानिस हिने नीरज मोरे सोबत आपला संसार थाटला होता. नीरज मोरे सॉफ्टवेअर इंजिनिअर असून अमेरिकेत तो कार्यरत आहे. मृणालचे लग्न जुळले त्यावेळी मृणाल ही लोकप्रिय अभिनेत्री आहे हे निरजला माहीत नव्हते.

तिचे फोटो सोशल मीडियावर सर्च केले तेव्हा प्रत्येक फोटोमध्ये ती साडी किंवा पंजाबी ड्रेसमध्येच जास्त पाहायला मिळाली.तिचा मॉडर्न लुक मधला एकही फोटो त्याला पाहायला मिळाला नाही. त्यावेळी कांदे पोह्याच्या कार्यक्रमात मृणालला पाहायला आल्यावर निरजने तिला प्रश्न विचारला होता की तू फक्त पंजाबी ड्रेस घालतेस का? आपल्या साधेपणाने आणि हसतमुख चेहऱ्याने मृणालने मराठी सृष्टीत स्वताची एक वेगळी ओळख निर्माण केली होती. लग्नानंतर मृणालने मालिकांमधून काम केले होते. मात्र अस्स सासर सुरेख बाई या मालिकेतून तिने काढता पाय घेऊन अमेरिकेत जाण्याचा महत्वाचा निर्णय घेतला होता. काही काळ अमेरिकेत राहिल्यानंतर मृणालकडे आणखी एक मोठा प्रोजेक्ट आला.

हे मन बावरे या मालिकेत तिला महत्वाची भूमिका साकारण्याची संधी मिळाल्याने पुन्हा तिने मायदेशी परतण्याचा निर्णय घेतला. मालिकेत शशांक केतकर सोबत मृणालची जोडी प्रेक्षकांना देखील खूपच भावली होती. माझिया प्रियाला प्रीत कळेना या मालिकेतून मृणालने छोट्या पडद्यावर पदार्पण केले होते. तू तिथे मी या आणखी एका मालिकेत प्रमुख भूमिका साकारल्यानंतर आम्ही सारे खवय्ये आणि रिमोट माझा या कार्यक्रमाचे सूत्रसंचालन केले होते. श्रीमंत दामोदर पंत या चित्रपटातून मृणाल मोठ्या पडद्यावर देखील झळकली होती. मालिकांमधून तिचा साधेपणा दिसत असला तरी आपल्या सहजसुंदर अभिनयाने तिने प्रेक्षकांची मने जिंकली होती.

आता परदेशात वास्तव्यास राहिल्यानंतर मृणालने घर संसारात रमणे अधिक पसंत केले आहे. निरजने आणि मृणालने आई बाबा होणार असल्याचे सोशल मीडियावर कळवले आहे. दोघांच्याही ह्या पोस्टवर सेलिब्रिटींनी अभिनंदनाचा वर्षाव केलेला पाहायला मिळतो आहे. तसेच या दिवसात तिला अधिक काळजी घेण्याचा सल्लाही दिला जात आहे. मृणाल आणि नीराजचे कलाकार इन्फोच्या टीमतर्फे खूप खूप अभिनंदन आणि शुभेच्छा.