तू चाल पुढं मालिकेत या हँडसम अभिनेत्याची एन्ट्री..

झी मराठी वाहिनीवरील तू चाल पुढं या मालिकेतील अश्विनी समोर एकापाठोपाठ एक संकटं येत आहेत. मात्र या संकटातून मार्ग काढत ती आपल्या संसाराचा गाडा चालवत आहे. नवऱ्याने नोकरी गमावली त्यामुळे तिच्या मुलींच्या आणि सासू सासऱ्यांची पर्यायाने नवऱ्याची देखील जबाबदारी ती घेत आहे. अश्विनी आता पार्लरमध्ये काम करून आपली स्वप्नं पूर्ण करण्यासाठी धडपडत आहे. तिच्या या यशाच्या मार्गात तिची नणंद मात्र आडकाठी बनत आहे. शिल्पी आता अश्विनीच्या विरोधात प्लॅन रचत आहे, तिच्या मदतीला विक्रमची एन्ट्री झाली आहे. विक्रम आणि शिल्पी दोघे मिळून अश्विनीला फसवण्याचा प्लॅन रचताना दिसत आहेत.

अश्विनीने मात्र शिल्पीसोबत विक्रमला पाहिले आहे. अश्विनी विक्रमपासून सावध भूमिका घेणार की त्या दोघांच्याही प्लॅनमधते फसली जाणार, हे पुढच्या भागात प्रेक्षकांना पाहायला मिळणार आहे. मालिकेत विक्रमच्या पात्राची एन्ट्री झाली आहे. ही भूमिका अभिनेता ध्रुव दातार साकारत आहे. ध्रुव हा अभिनेता असून त्याने हॉटेल मॅनेजमेंटचे प्रशिक्षण घेतले आहे. शिक्षण झाल्यानंतर त्याने आपली पाऊले मॉडेलिंग क्षेत्राकडे वळवली. विविध नामांकित ब्रॅण्डसाठी त्याने मॉडेलिंग केलं आहे. मॉडेलिंग करतानाच अभिनय क्षेत्रात देखील काम करण्याची त्याची ईच्छा होती. अभिनेता दिग्दर्शिक असलेल्या सुजीत देशपांडे सोबत त्याची ओळख झाली. संजय पवार लिखित मान्यतेच्या झग्याखाली या नाटकातून ध्रुवला प्रथम अभिनयाची संधी मिळाली.

अभिनयाचा कुठलाही अनुभव नसताना दिग्दर्शक सुजित देशपांडे याने ध्रुवला ही मोठी संधी मिळवून दिली. या नाटकाचे बरेचसे प्रयोग झाले, त्यामुळे रंगभूमीवर ध्रुव बिनधास्तपणे वावरताना दिसला. स्वराज्य सौदामिनी ताराराणी मालिकेत ध्रुवने दिलावर खानची भूमिका साकारली होती. ओमी वैद्य, स्नेहा देशमुख यांच्या आगामी मराठी चित्रपटातून ध्रुव मुख्य भूमिका साकारताना दिसणार आहे. या चित्रपटातून ध्रुव मोठया पडद्यावर देखील पाऊल टाकत आहे. ध्रुवच्या माध्यमातून मराठी सृष्टीला हँडसम अभिनेता लाभला आहे. छोट्या छोट्या भूमिकेतून पुढे जाऊन मुख्य भूमिका साकारताना दिसावा अशी अपेक्षा आहे. ध्रुवला यात नक्की यश मिळेल अशी आशा आहे. या यशस्वी वाटचालीसाठी उदयोन्मुख अभिनेता ध्रुव दातारला मनःपूर्वक शुभेच्छा.