अभिनय बेर्डेच्या ‘बाप्पा माझा एक नंबर’ ची सोशल मीडियावर हवा..

लक्ष्मीकांत बेर्डे यांच्या पश्चात त्यांच्या अभिनयाचा वारसा मुलगा अभिनय बेर्डे पुढे चालवताना दिसतो आहे. आई वडील दोघेही अभिनय क्षेत्रातलं प्रसिद्ध व्यक्तिमत्त्व असल्याने दोघांची तुलना त्यांच्या मुलांशी नक्कीच केलेली पाहायला मिळते. मात्र अभिनय हा उमदा कलाकार आणि एका वेगळ्या पठडीतला नायक असल्याने त्याची या बाबतीत तुलना झाली नाही हे विशेष. ती सध्या काय करते, अशी ही आशिकी, रंपाट यासारख्या चित्रपटातून अभिनय बेर्डेच्या सजग अभिनयाचे कौतुक झालेले पाहायला मिळाले. सध्या तो त्याच्या ‘मन कस्तुरी रे’ या आगामी चित्रपटामुळे चांगलाच चर्चेत आला आहे. ४ नोव्हेंबर २०२२ रोजी मन कस्तुरी रे हा चित्रपट प्रेक्षकांच्या भेटीला येत आहे.

मन कस्तुरी रे या चित्रपटात अभिनय बेर्डेची नायिका आहे हिंदी बिग बॉसच्या १५ व्या सिजनची विजेती तेजस्वी प्रकाश वायंगणकर. या चित्रपटाचे मोशन पोस्टर काही दिवसांपूर्वीच लॉन्च करण्यात आले होते. त्यावेळी अभिनय सोबत तेजस्विनी मराठी चित्रपट सृष्टीत पदार्पण करत असल्याचे पाहून सगळ्यांना आश्चर्य वाटले होते. मुंबई मुव्हीज स्टुडिओज प्रस्तुत मन कस्तुरी रे या चित्रपटाचे दिग्दर्शन संकेत माने यांनी केले आहे. येत्या काही दिवसात गणपती बाप्पाचे आगमन होत आहे. याचे औचित्य साधून चित्रपटातील ‘बाप्पा माझा १ नंबर’ या गाण्याची झलक नुकतीच प्रेक्षकांच्या भेटीला आली आहे. या गाण्यात अभिनय बेर्डे ढोल ताश्यांच्या गजरात सगळ्यांना थिरकायला लावताना दिसणार आहे. सोशल मीडियावर हे गाणं प्रेक्षकांची चांगलीच पसंती मिळवत आहे.

प्रिया बेर्डे यांनी देखील आपल्या लेकाच्या चित्रपटातलं गाणं सोशल मीडियावर शेअर केलं आहे. अवघ्या काही तासातच या गाण्याला प्रेक्षकांकडून खूप चांगला प्रतिसाद मिळत आहे त्यामुळे येत्या गणेशोत्सवाच्या काळात हे गाणं ट्रेंडमध्ये येईल असेच चित्र सध्यातरी दिसत आहे. मन कस्तुरी रे या चित्रपटात अभिनय बेर्डे आणि तेजस्वी प्रकाश प्रमुख भूमिका साकारत आहेत. त्यांच्यासोबत वीणा जामकर, तुषार घाडीगांवकर, विनम्र भाबळ, आकाश मिठबावकर, किशोर चौगुले, असित रेडीज, राजश्री देशपांडे, किरण तांबे हे कलाकार देखील महत्वाची भूमिका साकारताना दिसणार आहेत. राजश्री देशपांडे हिने बॉलिवूड चित्रपटातून बोल्ड भूमिका साकारल्या आहेत. त्यामुळे मराठी चित्रपटातून तिला महत्वाची भूमिका साकारण्याची संधी मिळाली आहे.