हिंदी रिऍलिटी शोमध्ये मराठमोळ्या कलाकारांचा बोलबाला.. शो हिट होण्यासाठी लढवली शक्कल

​कलर्स वाहिनीवर झलक दिखला जा हा हिंदी रिऍलिटी शो आजपासून प्रसारित केला जात आहे. वेगवेगळ्या सेलिब्रिटींमध्ये डान्सचा महामुकबला या रिऍलिटी शोमध्ये रंगलेला पाहायला मिळणार आहे. या शोचे सूत्रसंचालन मनी​​ष पॉल निभावणार आहे तर माधुरी दीक्षित, करण जोहर आणि नोरा फतेही या शोमध्ये जजची भूमिका साकारणार आहेत. आजपासून सुरू होत असलेल्या झलक दिखला जा च्या १० व्या सिजनची खासियत म्हणजे यामध्ये बरेचसे मराठमोळे सेलिब्रिटी स्पर्धक म्हणून सहभागी होताना दिसणार आहेत. अमृता खानविलकर हिने काही हिंदी रिऍलिटी शोमध्ये सहभाग घेतला होता.

मात्र आता माधुरी दीक्षित जज असताना तिच्यासमोर नृत्य सादर करण्याची संधी मिळाल्याने अमृता ​कमालीची ​खुश झालेली आहे. गेल्या काही दिवसांपासून बॉलिवूड चित्रपटांना विरोध दर्शवला जात आहे. त्यामुळे चित्रपटांवर बहिष्कार टाकण्यात येऊ लागले आहेत. याचा फायदा मराठी चित्रपटांना झालेला दिसून आला. मराठी कलाकारांना बॉलिवूडमध्ये अभिनयाची संधी याच कारणामुळे दिली जाते​.​ जेणेकरून किमान मराठी प्रेक्षक तरी आपले चित्रपट पाहतील. याच अनुषंगाने हिंदी वाहिन्यांवर देखील मराठी कलाकारांना अभिनयाची संधी मिळत आहे. आता चक्क एकाच रिऍलिटी शोमध्ये मराठी कलाकारांची मांदियाळीच सजलेली पाहायला मिळणार आहे. झलक दिखला जा च्या दहाव्या सिजनमध्ये गश्मीर महाजनी, अमृता खानविलकर, शिल्पा शिंदे असे सेलिब्रिटी सहभागी होत आहेत.

यासोबतच डीआयडी फेम वैष्णवी पाटील, प्रतीक उत्तेकर, सुचित्रा सावंत हे डान्सर देखील सहभागी स्पर्धकांना साथ देताना दिसणार आहेत. वैष्णवी पाटील आणि फैजल शेख, गश्मीर महाजनी आणि रोशमा सिंग, अमृता खानविलकर आणि प्रतीक उत्तेकर​. तसेच शिल्पा शिंदे आणि निश्चल शर्मा, झोरावर आणि सुचित्रा सावंत यांची जोडी झलक दिखला जा च्या मंचावर धुमाकूळ घालताना पाहायला मिळणार आहे. ह्या मराठी कलाकारांमुळे झलक दिखला जा चा शो सुपरहिट ठरेल असा विश्वास आयोजकांना देखील वाटत आहे. माधुरी दिक्षितने अशा रिऍलिटी शोमधून परिक्षकाची भूमिका चोख निभावली आहे.

तिच्यासोबत डान्स करायला अनेक स्पर्धक आणि सेलिब्रिटी देखील उत्सुक आहेत. अमृताची ही ईच्छा किमान या शोच्या प्रोमोमधून तरी पूर्ण झाली आहे. जिला पाहून आपण डान्स शिकलो तिच्यासोबत आज डान्स करण्याची संधी मिळाल्याने अमृताने आपल्या भावना व्यक्त केल्या होत्या. या शोमध्ये अमृताचा लावणी नृत्याचा अविष्कार देखील प्रेक्षकांना पाहायला मिळणार आहे​.​ त्यामुळे मराठी प्रेक्षकांना देखील या शोची उत्सुकता आहे.