झी मराठीची नवी मालिका.. हे कलाकार झळकणार मुख्य भूमिकेत

झी मराठी वाहिनीवर नव्या मालिकांचा बोलबाला पाहायला मिळत आहे. गेल्या काही दिवसांपासून या वाहिनीने जुन्या मालिकांना निरोप देऊन नव्या दमाच्या मालिका प्रेक्षकांच्या भेटीला आणल्या आहेत. अप्पी आमची कलेक्टर, तू चाल पुढं, नवा गडी नवं राज्य, बस बाई बस अशा मालिका प्रेक्षकांच्या भेटीस आल्या आहेत. त्यात लवकरच सातव्या मुलीची सातवी मुलगी ही नवी मालिका देखील प्रसारित होत आहे. या जोडीलाच १९ सप्टेंबर २०२२ पासून रात्री ८.३० वाजता ‘दार उघड बये’ ही नवी मालिका प्रसारित होत आहे. संबळ वाजवणाऱ्याच्या मनात भक्तिभाव असेल तर तिथे भेदभावाला जागा नाही असे म्हणत मालिकेची नायिका पुरुष आणि स्रियांमध्ये भेदभाव कुठून आला ही सर्व एकच तर आहेत या विचारांची आहे.

तिच्या विचारांचा आदर करणारा नायक वडिलांच्या विरोधाला कसा सामोरे जातो याची ही कहाणी आहे. दार उघड बये या मालिकेचा पहिला प्रोमो नुकताच प्रेक्षकांच्या भेटीला आला आहे. रोशन विचारे या मालिकेचा मुख्य नायक असून सानिया चौधरी मुख्य नायिकेची भूमिका साकारत आहे. शरद पोंक्षे, सुहास परांजपे, किशोरी अंबीए, रुचिरा जाधव हे कलाकार महत्वाची भूमिका साकारताना दिसणार आहेत. या मालिकेचे लेखन माझ्या नवऱ्याची बायको फेम अद्वैत दादरकर आणि मिहीर राजदा यांनी केलं आहे. संबळाची मोहिनी ‘मोहिनी भुसे’ या कलाकाराने घातली आहे. दार उघड बये या मालिकेचा प्रोमो प्रेक्षकांच्या भेटीला आला आणि तमाम प्रेक्षकांनी याबाबत नाराजी व्यक्त केली आहे.

कारण माझी तुझी रेशीमगाठ ही लोकप्रिय मालिका एक्झिट घेणार असल्यामुळे प्रेक्षक काहीसे नाराज झाले आहेत. माझी तुझी रेशीमगाठ मालिकेला नुकतेच एक वर्ष पूर्ण झाले. मात्र झी मराठीच्या या एकमेव मालिकेने टीआरपीच्या स्पर्धेत आपले स्थान टिकवून ठेवले होते. याअगोदर मन उडू उडू झालं या मालिकेला प्रेक्षकांनी खूप चांगला प्रतिसाद दिला होता. मात्र काही कालावधीनंतर मालिकेच्या कलाकारांना वेळ मिळत नसल्याने या मालिकेला निरोप द्यावा लागला त्यावेळी देखील प्रेक्षकांनी नाराजी दर्शवली होती. आणि आताही माझी तुझी रेशीमगाठ मालिका निरोप घेत असल्याचे कळताच प्रेक्षक नाराज झालेले पाहायला मिळत आहेत. मात्र येणारी नवी मालिका प्रेक्षकांना निश्चितच आपलेसे करेल असा विश्वास आहे. दार उघड बये या मालिकेच्या सर्व टीमला खूप खूप शुभेच्छा.