लेक माझी दुर्गा मालिकेत या अभिनेत्याची एन्ट्री..

कलर्स मराठीवरील लेक माझी दुर्गा या मालिकेत लवकरच एक धक्कादायक ट्विस्ट येणार आहे. नुकतेच दुर्गाच्या आईने आत्महत्या केली असल्याचे दिसून येते. मात्र माझी आई आत्महत्या करूच शकत नाही असा संशय तिला सतावत आहे. एकीकडे आपल्या आईच्या काळजीत असणाऱ्या दुर्गाचे आयुष्य एक गूढ बनले आहे. जयसिंगच्या आईला दुर्गा अगोदरपासूनच पसंत नव्हती. जयसिंगराव एवढा का मागे आहे हे त्याच्या आईला याहूनही समजलेले नाही. दुर्गाच्या भूतकाळामुळे जयसिंगवर कुठले संकट यायला नको अशी आईसाहेबांची अपेक्षा आहे. त्यामुळे येत्या काळात दुर्गाबाबत असलेले गूढ त्यांच्यासमोर लवकरच येणार आहे.

वैजयंतीच्या आत्महत्येनंतर दुर्गाला तिच्याजवळ एक अंगठी मिळते आणि ती कोणाची आहे याचा ती शोध घेत असते. यामागे भगतिनीचा तर हात नसेल ना अशी शंका जयसिंगने दुर्गाकडे उपस्थित केली आहे. इकडे वरुण शिवानीकडून दुर्गाबाबत गुपित जाणून घेतो. लहानपणापासून दुर्गाच्या मागावर एक बाई आहे आणि ती बाई कोण आहे? तिच्या भूतकाळात नेमकं काय दडलंय? हे आईसाहेब जाणून घेण्यासाठी उत्सुक आहेत. अशातच मालिकेत एका दमदार पात्राची एन्ट्री होत आहे. हे दमदार पात्र साकारले आहे अभिनेते संदेश जाधव यांनी. दुर्गाच्या मागावर आलेली ती बाई नेमकी कोण आणि तिचा उद्देश काय आहे याबाबत प्रेक्षकांना देखील जाणून घेण्याची उत्सुकता आहे. ही भूमिका गूढ असल्याने मालिकेची उत्कंठा अधिक वाढलेली पाहायला मिळत आहे.

संदेश यांनी मराठी हिंदी चित्रपट सृष्टीत विविधांगी भूमिका साकारल्या आहेत. लक्ष्य मालिकेतील त्यांनी निभावलेला इन्स्पेक्टर सूर्यकांत भोसले तितक्याच ताकदीचा वाटला. अभिनयासोबतच संदेश यांनी नाटकांचे दिग्दर्शनही केले आहे. ब्लॅक आउट, अबोली, ग्वाही, मोलकरीण बाई, ये रे ये रे पावसा, कमीने, अगली अशा चित्रपट मालिका आणि नाटकांमधून ते प्रेक्षकांच्या भेटीला आले आहेत. लेक माझी दुर्गा या मालिकेतून एका आगळ्या वेगळ्या भूमिकेतून ते प्रेक्षकांसमोर येत आहेत. ही भूमिका मालिकेत एक धक्कादायक ट्विस्ट आणणारी ठरणार आहे त्यामुळे त्यांचे पात्र तेवढेच महत्वपूर्ण असणार आहे. दुर्गाचे गूढ या ट्विस्टमुळे उलगडणार की ती संकटात सापडणार हे येत्या काही भागात स्पष्ट होईल. तूर्तास संदेश जाधव यांना या नव्या भूमिकेसाठी मनःपूर्वक शुभेच्छा.