देवमाणूस २ मालिकेत या दोन अभिनेत्रींची एन्ट्री..

देवमाणूस २ या मालिकेत आता अजितकुमार आणि डिंपल लवकरच पोलिसांच्या जाळ्यात अडकताना दिसणार आहेत. नुकतेच डॉक्टरने एक फोन नव्हे तर तब्बल ३८ खून केल्याचे सांगितले आहे. मात्र पुराव्यानिशी मला पकडून दाखव असे चॅलेंज आता त्याने इन्स्पेक्टर जामकरला दिले आहे. मालिकेत आता ट्विस्ट आला आहे, जामकर मुंबईत जाऊन डॉक्टरची चौकशी करण्यासाठी जातो. तिथे त्याला डॉक्टरला ओळखणारी एक महिला डॉक्टर भेटते. मात्र जामकरने दाखवलेला फोटोतील व्यक्ती डॉ अजितकुमार नसल्याचे ती सांगते. या महिलेकडून आता अजितकुमारबद्दल बराचसा खुलासा होणार असल्याने हे पात्र महत्वाचे मानले जात आहे.

हे पात्र साकारले आहे अभिनेत्री संध्या माणिक हिने. संध्या माणिक बोंबले ही मूळची खेड तालुक्यातील वेताळे गावची. तिचे आई वडील शेतकरी मात्र लहानपणापासूनच संध्या मुंबईतच होती. डी वाय पाटील विधी महाविद्यालयातून तिने वकिलीचे शिक्षण घेतले. कॉलेजमध्ये असल्यापासूनच संध्या वेगवेगळ्या सांस्कृतिक कार्यक्रमात सहभागी व्हायची. दिल दोस्ती दुनियादारी, सावित्रीबाई फुले, अहिल्या, गुरू, कलंक, तुझ्यात जीव रंगला अशा मालिका चित्रपटातून ती झळकली आहे. तुझ्यात जीव रंगला या लोकप्रिय मालिकेमुळे ती प्रकाशझोतात आलेली पाहायला मिळाली. यात तिने सुरजची पत्नी माधुरीची भूमिका साकारली होती.

माधुरीचे पात्र विरोधी असल्याने संध्यावर प्रेक्षकांचा रोष होता. आता ती देवमाणूस २ या मालिकेत सक्रिय झाली आहे. तिच्या येण्याने मालिकेला एक वेगळे वळण नक्कीच मिळणार आहे. डॉक्टरबद्दल ती अजून कुठला खुलासा करणार याची अधिक उत्सुकता लागून राहिली आहे. संध्या माणिक हिच्यासोबत चला हवा येऊ द्या फेम स्नेहल शिदमची देखील या मालिकेत एन्ट्री होत आहे. स्नेहल शिदम या मालिकेतून इन्स्पेक्टर मार्तंड जामकरच्या पत्नीची भूमिका साकारणार आहे. जामकर जितका खतरनाक इन्स्पेक्टर आहे तशी त्याची पत्नी वेंधळी आणि विनोदी दाखवण्यात आली आहे. नुकतेच स्नेहलने मालिकेच्या शूटिंगला सुरुवात केली आहे.

जामकर आता मुंबईला जाणार असल्याने त्याची पत्नी देखील त्याच्यासोबत जाण्याचा हट्ट करत आहे. ही भूमिका स्नेहल तिच्या अभिनयाने उत्तम निभावणार याची खात्री आहे. भागो मोहन प्यारे, माझा होशील ना या मालिकेत स्नेहल शिदमने अभिनय साकारला होता. या दोन्ही नव्या पात्राच्या येण्याने देवमाणूस २ ही मालिका अधिक रंजक होईल अशी प्रेक्षकांना खात्री वाटत आहे. त्यामुळे लवकरच अजित कुमार पोलिसांच्या जाळ्यात सापडणार असल्याची चिन्ह दिसू लागली आहेत. संध्या माणिक आणि स्नेहल शिदम यांना नव्या भूमिकेसाठी खूप खूप शुभेच्छा.