हिंदी बिग बॉसचा सिजन गाजवणाऱ्या अभिनेत्रीचे मराठी सृष्टीत पदार्पण.. अभिनय बेर्डे सोबत दिसणार चित्रपटात

​अशी ही आशिकी, ती सध्या काय करते, रंपाट या चित्रपटातून सुपरस्टार लक्ष्मीकांत बेर्डे यांचा मुलगा अभिनय बेर्डे मुख्य भूमिकेत झळकला होता. आता लवकरच अभिनय बेर्डे नव्या चित्रपयातून प्रेक्षकांच्या भेटीला येत आहे. संकेत माने दिग्दर्शित ‘मन कस्तुरी रे’ हा मराठी चित्रपट लवकरच मोठ्या पडद्यावर पाहायला मिळणार आहे. अभिनय बेर्डे मुख्य नायकाची भूमिका साकारणार असून तेजस्वी प्रकाश मुख्य नायिकेची भूमिका साकारणार आहे. नुकत्याच झालेल्या हिंदी बिग बॉसच्या पंधराव्या सिजनमध्ये तेज​​स्वी प्रकाशने सगळ्यांचे लक्ष्य वेधून घेतले होते या शोची ती विजेती ठरली होती. या शोनंतर तेजस्वी नागीण या हिंदी मालिकेत झळकली.

तेजस्वी आता प्रथमच मराठी सृष्टीत पदर्पणास सज्ज झालेली पाहायला मिळणार आहे. तेजस्वी प्रकाश ही मराठी मुलगी आहे. तेजस्वी प्रकाश वायंगणकर हे तिचे पूर्ण नाव आहे. बिग बॉसच्या १५ व्या सिजनचे विजेतेपद एका मराठी मुलीने जिंकले म्हणून तिचे कौतुक करण्यात आले होते. संस्कार धरोहर अपनों की या मालिकेतून तिने अभिनय क्षेत्रात पदार्पण केले होते. त्यानंतर हिंदी मालिका सृष्टीत चांगली स्थिरावलेली पाहायला मिळाली. मधुबाला, थपकी प्यार की ,उडान, बालिका वधू, कृष्णदासी या मालिकांमधून तिला अनेक महत्त्वाच्या भूमिका साकारण्याची संधी मिळाली. हिंदी मालिका सृष्टी गाजवत असतानाच तिने आता मराठी चित्रपट सृष्टीत पाऊल टाकले आहे. मन कस्तुरी रे या चित्रपटाचे पोस्टर नुकतेच लॉन्च करण्यात आले आहे.

यात अभिनय बेर्डे सह वीणा जामकर, तुषार घाडीगांवकर, विनम्र बाभळ, आकाश मिठभवकर यांच्याही महत्वाच्या भूमिका असणार आहेत. तेजस्वीने देखील सोशल मीडियावरन तिच्या पहिल्या मराठी चित्रपटाबाबत जाहीर केले त्यामुळे तिच्या बॉलिवूड चाहत्यांमध्ये या चित्रपटाबाबत प्रचंड उत्सुकता आहे. तेजस्वीचा बॉयफ्रेंड करण कुंद्रा याने देखील तेजस्वीला पहिल्या वहिल्या मराठी चित्रपटाच्या शुभेच्छा दिल्या आहेत. बिग बॉसच्या १५ व्या सिजनमध्ये या दोघांचे सूर जुळून आले होते. मन कस्तुरी रे हा तेजस्वीचा पहिला मराठी चित्रपट आहे मात्र याअगोदर ती ‘स्कुल, कॉलेज आणि लाईफ’ या मराठी चित्रपटात झळकणार असे बोलले जात होते.

विहान सूर्यवंशी या चित्रपटाचे दिग्दर्शन करणार होता तर रोहित शेट्टी या चित्रपटाच्या निर्मितीची धुरा सांभाळणार होते. या चित्रपटाबद्दल वृत्त माध्यमातून चर्चा देखील झाली होती. मात्र पुढे ह्याबाबत कुठलीच बातमी समोर आली नसल्याने हा चित्रपट येईल की नाही याबाबत शंका उपस्थित केली जात आहे. मात्र असे असले तरी तेजस्वी प्रकाशचा अभिनय बेर्डे सोबतचा पहिला चित्रपट प्रेक्षकांच्या भेटीला येत आहे. गुढी पाडव्याच्या मुहूर्तावर मन कस्तुरी रे चित्रपटाचे पहिले पोस्टर प्रकाशित करण्यात आले आहे. या चित्रपटाबाबत अभिनय आणि तेजस्वी खूपच उत्सुक आहेत. अर्थातच त्यांच्या ईतकीच उत्सुकता प्रेक्षकांमध्ये देखील निर्माण झालेली पाहायला मिळत आहे.