घेतली एकदाची.. असे म्हणत दादूसने खरेदी केली एवढ्या लाखांची मर्सिडीज

​सोशल मीडियावरून आजवर अनेक कलाकारांना प्रसिद्धी मिळाली आहे. त्यात सर्वांचा लाडका दादूस म्हणजेच विनायक माळी हा देखील प्रसिद्धीच्या शिखरावर पोहोचला. विनायक माळीचे आगरी भाषेतील विनोदी व्हिडीओ प्रेक्षकांना पाहायला खूप मजेशीर वाटतात. याचाच ठाव घेत विनायक माळीने युट्युबवर स्वतःचे चॅनल सुरू केले. आतापर्यत त्याच्या ह्या चॅनलला २२ लाखांहून अधिक जणांनी सबस्क्राईब केलं आहे. त्याचे बरेचसे व्हिडीओ काही कालावधीतच लाखोंची प्रसिद्धी मिळवताना दिसतात. लोकांचा उदं​​ड प्रतिसाद हीच त्याच्या यशाची खरी पायरी ठरली आहे. आणि याच यशामुळे आता त्याने पाच दहा लाख नव्हे तर चक्क ६२ लाखांची मर्सिडीज बेंझ गाडी खरेदी केली आहे.

मर्सिडीज बेंझची सी क्लास ही आलिशान गाडी खरेदी करत विनायक माळीने सोशल मीडियावर हवा केली आहे. विनायकचे हे यश त्याला सहजासहजी मिळालेले नसून त्यामागे त्याची अपार मेहनत फळाला आली असे म्हणावे लागेल. गेल्या अनेक वर्षांपासून विनायक आपले विनोदी व्हिडीओ प्रेक्षकांसमोर आणतो आहे. त्याच्या या व्हिडिओजचे खास वैशिष्ट्य ठरले आहे ते त्याच्या ग्रामीण भाषेतील अभिनयाचे. साधे सोपे विनोद पण तितक्याच हटके अंदाज तो असे व्हिडीओ बनवताना दिसतो. स्वतःवर विनोद करणे हे कित्येकांना पचनी न पडणारे आहे पण विनायक स्वतःचेच हसू या व्हिडिओतून घडवताना दिसतो. त्याचा हाच साधेपणा नेटकऱ्यांना आवडला असल्याने त्याचे व्हिडीओ तरुणांना आवडू लागले आहेत.

दादूस विनायक माळी ठाण्यातच कोकणी कुटुंबात लहानाचा मोठा झाला. सुरुवातीला त्याने विप्रो कंपनीमध्ये नोकरी केली होती. मात्र काही खाजगी कारणास्तव त्याने ही नोकरी सोडून देण्याचा निर्णय घेतला. त्यानंतर त्याने सोशल मीडियावर प्रसिद्धी मिळवण्याचा प्रयत्न केला. सुरुवातीला हिंदी मधून त्याने विनोद निर्मिती करण्यास सुरुवात केली, मात्र प्रेक्षकांनी त्याकडे पाठ फिरवली. शेवटी आपल्या ग्रामीण भाषेचा बाज असलेले व्हिडीओ बनवण्याचा त्याने प्रयत्न केला. आपल्या मित्रांसोबत केलेले विविध विषयांवरील साधे सरळ विनोदी प्रसंग लोकांना आवडू लागले. कॉलेज तरुण तरुणींना आवडतील अशा माध्यमातून प्रत्येकाच्या आयुष्यात घडणाऱ्या प्रसंगांना लोकांनी अक्षरशः डोक्यावर घेतले.

नोकरी सोडून स्वतःची ओळख निर्माण करण्याचा त्याचा हा प्रयत्न यशस्वी झाला. पाहता पाहता त्याच्या या अभिनयाला रसिक प्रेक्षकांचा भरघोस प्रतिसाद मिळत गेला. आज फेसबुक, युट्युब तसेच इन्स्टग्रामवर त्याचे अनेक चाहते त्याला फॉलो करताना दिसत आहेत. त्यामुळे सोशल मीडिया स्टार अशी ओळख त्याने नव्याने मिळवली आहे. यशाच्या शिखरावर पोहोचलेल्या विनायक माळीने आता मर्सिडीज बेंझ ही आलिशान गाडी खरेदी करून त्याच्या चाहत्यांना आश्चर्यचकित केले आहे. यापुढेही विनायक माळी असेच भरघोस यश मिळत राहो हीच एक सदिच्छा.