डॉक्टर ते अभिनेत्री.. असा आहे शिवा मालिकेतील दिव्याचा प्रवास

झी मराठीवरील शिवा या मालिकेला अल्पावधीतच प्रेक्षकांची पसंती मिळत आहे. शिवा आणि आशु असे या मालिकेचे नायक नायिका आहेत. पण आशुचे लग्न जुळवण्याच्या भानगडीत तो दिव्याच्या प्रेमात पडलेला पाहायला मिळत आहे. शिवा म्हणजेच शिवानीची बहीण दिव्याला श्रीमंत मुलासोबत लग्न करायचं आहे. तिला तिच्या सुंदर दिसण्याचा गर्व आहे म्हणूनच  श्रीमंत मुलासोबतच लग्न करायचं असा तिचा विचार आहे. दिव्याला आशुचे स्थळ चालून आले आहे मात्र ती त्याचा फोटो न बघताच त्याला नकार देते.

पण या दोघांची एका पार्टीत भेट घडून येणार आहे. तिथे दिव्याला आशु आवडणार का हे पाहावे लागेल. दरम्यान दिव्याची भूमिका साकारणाऱ्या अभिनेत्रीबद्दल काही खास गोष्टी जाणून घेऊयात. मालिकेत दिव्याची भूमिका नकारात्मक आहे. सृष्टी बाहेकर हिने ही भूमिका साकारली आहे. सृष्टी ही रिअल लाईफमध्ये डॉक्टर आहे. तिने डेंटिस्टची पदवी मिळवली असून काही दिवस तिने या क्षेत्रात प्रॅक्टिस देखील केली होती. मराठी सृष्टीत डेंटिस्ट असणाऱ्या आणखी काही अभिनेत्री आहेत. डॉक्टरकीचा पेशा सोडून त्या आता पूर्ण वेळ अभिनेत्री बनल्या आहेत.

मयुरी देशमुख, रुपल नंद या देखील डेंटिस्ट असून मराठी सृष्टीत त्यांनी प्रमुख भूमिका गाजवल्या आहेत. अशातच सृष्टीने देखील अभिनयाची आवड जोपासलेली पाहायला मिळाली. लहानपणापासूनच सृष्टीला टीव्ही पाहण्याची भयंकर आवड होती. तेव्हापासूनच तिने ठरवलं होतं की मोठेपणी आपण टीव्हीवर यायचं. पण शालेय शिक्षणात हुशार असल्याने सृष्टीने कॉलेजच्या सांस्कृतिक कार्यक्रमातून सहभाग दर्शवला. डान्सचे क्लास, नाटक अशा माध्यमातून ती कलेची आवड जोपासत राहिली. शेवटच्या वर्षात शिकत असतानाच सृष्टीला इंडिया के मस्त कलाकार या सोनी टीव्हीच्या रिऍलिटी शोमध्ये झळकण्याची संधी मिळाली. आणि या माध्यमातून तिचे अभिनय क्षेत्रात पाऊल पडले.

बैस ना ऐक ना या गाण्यात सृष्टीला प्रमुख भूमिका मिळाली. कलर्स मराठीच्या जय जय स्वामी समर्थ, कारण गुन्ह्याला माफी नाही या मालिकेनंतर सृष्टी आता शिवा मालिकेतून प्रेक्षकांच्या भेटीला आली आहे. या मालिकेमुळे तिच्या अभिनयाला पुरेसा वाव मिळणार आहे. दिव्याची भूमिका ही विरोधी असल्याने सृष्टीला नक्कीच प्रेक्षकांच्या रोषाला सामोरे जावे लागणार आहे. या दमदार भूमिकेसाठी सृष्टी बाहेकर हिला खूप खूप शुभेच्छा.