​प्रिया बेर्डे नंतर या अभिनेत्याने पुण्यात सुरू केलं आलिशान हॉटेल..

मराठी सृष्टीतील कलाकार मंडळी जोड व्यवसाय म्हणून हॉटेल व्यवसायाकडे वळतात. प्रिया बेर्डे यांनी देखील पुण्यात दोन ठिकाणी चख ले नावाने हॉटेल सुरू केले आहेत. आईच्या गावात या शशांक केतकरच्या हॉटेलला खवय्यांची चांगली पसंती मिळाली होती. पुरेशा वेळेअभावी त्याने हे हॉटेल नंतर बंद करण्याचा निर्णय घेतला. तर तुझ्यात जीव रंगला फेम हार्दिक जोशीचे राणादा थंडाई या नावाने कोल्हापूर येथे थंडाई विक्रीचा व्यवसाय थाटला आहे..आपल्या चाहत्यांकडून कलाकारांना त्यांच्या अभिनयाची पावती वेळोवेळी मिळतच असते. त्यांच्या हॉटेलातील पदार्थांची चव चाखून अनेकजण उत्तम चव असल्याचे सांगतात.

गोव्याच्या किनाऱ्यावर फेम सुहृद वर्डेकर हा देखील आता हॉटेल व्यवसायात उतरला आहे. लिगली २१ या नावाने सुहृदने आलिशान रेस्टॉरंट उभारले आहे. पुण्यातील वाकड परिसरातील काका हलवाई दुकानासमोर सुहृदचं रेस्टॉरंट मोठ्या दिमाखात उभं राहिलं आहे. या रेस्टॉरंटची खासियत अशी आहे की, इथे तुम्ही संगीताच्या तालावर डान्स पार्टी करत कॉकटेलसह चविष्ट पदार्थांची चव चाखू शकता. २१ सप्टेंबर रोजी सुहृदच्या या रेस्टॉरंटचे उद्घाटन करण्यात आले होते. हॉटेल व्यवसायात उडी घेणाऱ्या सुहृदला मराठी सेलिब्रिटींनी तसेच त्याच्या चाहत्यांनी भरभरून शुभेच्छा दिल्या आहेत. सुहृद वर्डेकर हा मराठी मालिका अभिनेता आणि दिग्दर्शक आहे. असावा सुंदर स्वप्नांचा बंगला या मालिकेतून सुहृदने छोट्या पडद्यावर आगमन केले होते.

या मालिकेत तो प्रमुख नायकाच्या भूमिकेत पाहायला मिळाला. मालिकेत पदार्पण करण्याअगोदर सुहृदने रेडिओ जॉकी म्हणून लोकप्रियता मिळवली होती. इथूनच त्याला अभिनयाची खरी संधी मिळाली होती. रेडिओ जॉकी करता करता अनेक मराठी कलाकारांशी त्याची ओळख झाली. या ओळखीमुळे सुहृदला अभिनयाची गोडी निर्माण झाली. त्यामुळे मालिकेत काम करत असताना त्याला फारसे दडपण आले नाही. एक घर मंतलेलं, दाह एक मर्मस्पर्शी कथा या काही मालिकेतून तो झळकला आहे. एक घर मंतरलेलं या मालिकेत सुयश टिळक आणि सुरुची आडरकर यांच्यासोबत त्याला महत्वाची भूमिका साकारण्याची संधी मिळाली होती. गोव्याच्या किनाऱ्यावर, ह्या गाण्याला युट्युबवर अनेक हिट मिळाले आहेत.

या गाण्यामुळे सुहृद वर्डेकर आणि सिद्धी पाटणे यांना तुफान प्रसिद्धी मिळाली होती. ह्या गाण्याचे दिग्दर्शन देखील सुहृदनेच केले होते. गोव्याच्या किनाऱ्यावर या गाण्याच्या हिट नंतर सुहृद आणि सिद्धी पाटणे यांनी अनेक व्हिडीओ सॉंग एकत्रित साकारले होते. भास तुझा, प्रथम नमो या त्याच्या व्हिडीओ सॉंगला देखील प्रेक्षकांकडून चांगला प्रतिसाद मिळाला होता. २९ जानेवारी २०२० रोजी सुहृद वर्डेकर हा प्राची खडतकर हिच्यासोबत विवाहबद्ध झाला होता. त्याला एक मुलगी देखील आहे.