वाफाळता चहा पाहून सिद्धार्थ चांदेकर म्हणतोय, तू इथे हवी होतीस.. कुणासाठी झाला रोमँटिक

अभिनेता सिध्दार्थ चांदेकर लवकरच नव्या सिनेमात दिसणार आहे. सिध्दार्थने त्याच्या सोशल मीडियावरील एका पोस्टमधून हिंट दिली आहे. रूद्रप्रयागच्या मस्त थंडीत वाफाळता चहा पिताना तो म्हणतोय की, तू इथे असतीस तर बरं झालं असतं. सिध्दार्थला नेमकी कुणाची आठवण येतेय बरं. खिडकीबाहेर नजर लावून बसलेल्या सिद्धार्थला हवी आहे तिची सोबत. पण कुणाची साथ हवी असं त्याला वाटतय हे त्याने कोड्यातच ठेवलं आहे. आता हा फोटो बघून चाहते बुचकळ्यात पडतील नाहीतर काय. गेल्याच महिन्यात काँग्रॅच्युलेशन्स या सिनेमाच्या शूटिंगसाठी सिद्धार्थने लंडनवारी केली. लोकेश गुप्ते दिग्दर्शित या सिनेमात त्याच्यासोबत पूजा सावंत आणि अलका कुबल यादेखील आहेत.

शूटिंगमधून वेळ मिळताच सिध्दार्थने शूट केलेले व्हिडिओ शेअर केले होते. आता नव्या सिनेमाच्या शूटिंगसाठी सिध्दार्थची स्वारी पोहोचली आहे ती उत्तराखंड राज्यातील रूद्रप्रयाग या निसर्गरम्य शहरात. मराठी सिनेविश्वात सिध्दार्थ चांदेकर हा नवा रोमँटिक हिरो म्हणून नावारूपाला आला आहे. अग्निहोत्र या मालिकेतून सुरू झालेला सिध्दार्थचा अभिनयप्रवास आता मोठ्या पडद्यापर्यंत आला आहे. सिद्धार्थचा नवा सिनेमा कोणता येणार याची त्याच्या चाहत्यांना उत्सुकता असते.  सिद्धार्थही त्याच्या सोशल मीडियावर मजेशीर व्हिडिओ, हटके रिल्स यासोबत त्याच्या नव्या सिनेमाविषयी संवाद साधत असतो. शूटिंगच्या निमित्ताने भटकंती करत असताना सिध्दार्थ वेळ मिळेल तेव्हा एन्जॉय करतानाही त्याचे चाहते पाहतात.

सध्या नव्या सिनेमाच्या शूटिंगसाठी सिद्धार्थ उत्तराखंडमधील रूद्रप्रयागला पोहोचला आहे. रूद्रप्रयागमधील थंड वातावरण आणि समोर वाफाळता चहा बघून सिध्दार्थच्या तोंडून एक इच्छा बाहेर पडली आहे. काय आहे त्याच्या मनात आणि तो रूद्रप्रयागच्या दरी खोऱ्यात कुणासाठी रोमँटीक झालाय ते काही कळेना झाल्यामुळे चाहते अस्वस्थ झाले आहेत. देहरादून पासून जवळ असलेल्या रूद्रप्रयागमधील एका हॉटेलमधील फोटो सिध्दार्थने त्याच्या इन्स्टापेजवर शेअर केला आहे. सिध्दार्थच्या टेबलवर वाफाळता चहा आहे आणि त्याची नजर खिडकीतून डोकावणाऱ्या निसर्गावर आहे. या फोटोसोबत जी ओळ लिहिली आहे ती खूपच लक्ष वेधून घेत आहे.  सिद्धार्थने अशी कॅप्शन लिहिली आहे की, तू इथे असतीस तर खूप बरं झालं असतं.

आता सिध्दार्थला अशा रोमँटिक वातावरणात नक्कीच त्याची बायको अभिनेत्री मिताली मयेकर हिची आठवण येत असणार. लंडनहून महिन्याभराने येण्यापूर्वीही त्याने मितालीसाठी कधी एकदा तुला भेटतोय अशी कमेंट आणि फोटो शेअर केला होता. त्यामुळे आता ही पोस्ट त्याने मितालीसाठी केलीय असा अंदाज चाहत्यांनी लावला आहे. नवीन सिनेमा, शूटिंग अशा काही टॅगलाइनही त्याने जोडल्या असल्याने सिध्दार्थच्या नव्या सिनेमाचं शूटिंग इथे होणार हे नक्की आहे. त्याच्यासोबत अभिनेत्री सायली संजीव ही देखील आहे. ती फोटोत एकत्र जरी दिसत नसली तरी सायलीच्या पेजवरही रूद्रप्रयाग मधील त्याच हॉटेलमधील फोटो आहेत आणि त्या फोटोंना सायलीने सिध्दार्थने ते फोटो काढल्याचे क्रेडिट दिलं आहे.