अभिनेत्रीच्या हातावर सजली मेहेंदी.. साखरपुड्याची झाली जोरदार तयारी

मराठी सृष्टीतील प्रसिद्ध अभिनेत्री लवकरच नात्याच्या बंधनात अडकणार आहे. कालच या अभिनेत्रीने तिच्या साखरपुड्याची तारीख जाहीर करताच अभिनंदनाचा वर्षाव करण्यात आला होता. ही अभिनेत्री आहे मीरा जोशी. मीरा जोशी ही गेली अनेक वर्षे मराठी सृष्टीत अभिनेत्री तसेच नृत्यांगना म्हणून कार्यरत आहे. डान्सच्या अनेक रिऍलिटी शो मध्ये मीराने सहभाग दर्शवला होता. आपल्या नृत्याने मिराने प्रेक्षकांची मनं जिंकून घेतली होती. याशिवाय मालिका आणि चित्रपटातूनही मिराने अभिनय साकारला होता.

५ सप्टेंबर रोजी मीरा साखरपुडा करत असल्याची बातमी तिने जाहीर केली होती. काही दिवसांपूर्वी पाठमोऱ्या असलेल्या बॉयफ्रेंडचा फोटो शेअर करत मिराने तिच्या प्रेमाची जाहीर कबुली दिली होती. त्यानंतर काल साखरपुड्याची तारीख जाहीर करत तिने बॉयफ्रेंडचाही खुलासा केला. मीरा ज्याच्याशी साखरपुडा करणार आहे तो नेहुल वारुळे हा देखील डान्सर आणि कोरिओग्राफर आहे. नेहुलने मी होणार सुपरस्टार आणि डान्स महाराष्ट्र डान्स सारखे रिऍलिटी शो जिंकले आहेत. अस्स्खलित डान्स परफॉर्मन्सने त्याने सर्वांची माने जिंकून घेतली होती. मोठमोठ्या कार्यक्रमांसाठी तो कोरिओग्राफर म्हणून काम करताना पाहायला मिळतो. सोबतच नृत्याची प्रशिक्षण शिबिरे देखील आयोजित करत असतो.

नेहुल प्रमाणे मीराला सुद्धा डान्सची आवड आहे. दोघांची ही आवड लक्षात घेऊनच त्यांनी एकमेकांसोबत लग्न करण्याचा निर्णय घेतला. काही दिवसांपूर्वी मिराने पुण्यात स्वतःचा फ्लॅट खरेदी केला होता. घर खरेदी करण्याचा आनंद आणि आता साखरपुड्याची बातमी यामुळे जोशी कुटुंबात आनंदाला उधाण आलं आहे. नुकतीच मिराने तिच्या साखरपुड्याची लगबग सुरू केली आहे. नेहुलच्या नावाची मिराने तिच्या हातावर आता मेहेंदी सजवली आहे. त्यामुळे तिच्या चाहत्यांमध्ये साखरपुड्याची उत्सुकता लागून राहिली आहे. नेहुल आणि मीराला आयुष्यातील या नवीन प्रवासासाठी अभिनंदन आणि खूप खूप शुभेच्छा.