बऱ्याच प्रतीक्षेनंतर प्रसिद्ध अभिनेत्रीचे छोट्या पडद्यावर पुनरागमन..

सोनी मराठीवरील तुमची मुलगी काय करते या मालिकेत एक आई मुलीचा शोध घेताना पाहायला मिळाली. नुकतेच सावनीला शोधण्यात त्यांना यश आले आहे. मात्र आता या मालिकेत डॉ निलांजना वर्माची एन्ट्री झाल्याने आणखी एक अडथळा निर्माण झाला आहे. ही भूमिका प्रसिद्ध अभिनेत्री मनवा नाईक साकारत आहे. तुमची मुलगी काय करते या मालिकेच्या निर्मितीची धुरा मनवाने निभावली आहे. त्यानंतर आता ती या मालिकेतून बऱ्याच वर्षांच्या प्रतीक्षेनंतर अभिनय क्षेत्रात दाखल होत आहे. हॅम्लेट या नाटकात मनवा अभिनय करत असली तरी मालिकेतून ती खूप वर्षांनी प्रेक्षकांच्या भेटीला येत आहे. त्यामुळे मनवाचे एक अभिनेत्री म्हणून सगळ्यांनीच तिचे स्वागत केले आहे.

मनवा नाईकला अभिनयाचे बाळकडू आई मीना नाईक यांच्याकडून मिळाले. दिवंगत अभिनेत्री रेखा कामत तसेच ज्येष्ठ अभिनेत्री चित्रा नवाथे या मनवाच्या मावशी आहेत. मनवाच्या बालपणी तिच्या घरी भीमसेन जोशी सारख्या मोठमोठ्या कलाकारांचा सतत वावर असायचा. शाळा सुटली की आईसोबत नाटकाच्या तालमी बघायला जायची. शाळेत असताना मनवा छोट्या छोट्या नाटकातून काम करत असे, तसेच शाळेतील कार्यक्रमाचे ती सूत्रसंचालनही करत असे. पुढे कॉलेजमध्ये असताना आभाळमाया मालिकेत काम करण्याची संधी मिळाली. बीएच पदवीचे शिक्षण पूर्ण झाल्यावर आईला भेटण्यासाठी ती एका सेटवर गेली होती. तिथे स्पेशल कॉड्स मालिकेसाठी तिला सहज म्हणून ऑडिशन देण्यास सांगितले, त्यात तिची निवड करण्यात आली.

ही तिने अभिनित केलेली पहिली हिंदी मालिका ठरली होती. तीन बहुरानीयां अशा हिंदी मालिकेतून मनवा महत्वाच्या भूमिका साकारू लागली. परंतु हिंदी मालिकेत रमण्यापेक्षा तिने मराठी सृष्टीत काम करण्याला अधिक पसंती दिली. क्षणभर विश्रांती, काकस्पर्श, लहानपण देगा देवा, नो एन्ट्री पुढे धोका आहे, दम असेल तर असे चित्रपट तिने साकारले. परंतु अभिनय क्षेत्रात  करण्यापेक्षा मनवाला कॅमेऱ्यामागे राहून काम करण्याची इच्छा होती. एकच गोष्ट आयुष्यभर करण्यापेक्षा नवीन गोष्ट शिकत राहणे हे तिने अधिक पसंत केले.आणि दिग्दर्शन तसेच निर्मिती क्षेत्राकडे आपली पावले वळवली. जोधा अकबर या हिंदी चित्रपटासाठी मानवाला संधी चालून आली.

त्यावेळी अशुतोष गोवारीकर एक दिग्दर्शक म्हणून कसा आहे हे जाणून घेण्यासाठी तिने या चित्रपटात काम करण्याची तयारी दर्शवली. पोरबाजार या चित्रपटातून मनवाने दिग्दर्शन क्षेत्रात पाऊल टाकले. कलर्स मराठीवरील सुंदरा मनामध्ये भरली, तुमची मुलगी काय करते, बॉस माझी लाडाची अशा मालिकांमधून ती कॅमेऱ्यामागे राहून निर्माती आणि दिग्दर्शिका म्हणून नवे अनुभव घेत आहे. एक अभिनेत्री म्हणून आता मनवा नाईक पुन्हा एकदा मालिकेकडे वळली आहे. तुमची मुलगी काय करते या मालिकेत नुकतीच तिची एन्ट्री झाली आहे. त्यामुळे तिच्या अभिनय क्षेत्राच्या पुनःपदार्पणासाठी सर्वांनी भरभरून शुभेच्छा दिल्या आहेत.