तुझेच मी गीत गात आहे मालिकेतील सीमा आज्जीची मुलगी आहे प्रसिद्ध अभिनेत्री

स्टार प्रवाहवरील तुझेच मी गीत गात आहे या मालिकेला प्रेक्षकांकडून खूप चांगला प्रतिसाद मिळाला आहे. मालिकेत आता लवकरच एक नवा ट्विस्ट येणार आहे. मल्हार आणि मोनिका पुन्हा एकदा लग्न करण्याचा निर्णय घेत आहेत. मोनिकाच्या पूर्वायुष्यातील एक व्यक्ती व्यत्यय आणताना दिसणार आहे, त्यामुळे मोनिका खूपच घाबरली आहे. तर इकडे वैदेहीला मोक्ष प्राप्ती व्हावी म्हणून सीमा आजी आणि विजय काका मल्हारच्या हातून विधी पूर्ण करून घेत आहेत. स्वरा ही मल्हारचीच मुलगी आहे हे आज्जीला समजले आहे. मात्र मोनिकाला हे सत्य समजू नये म्हणून त्यांनी विजयला देखील सांगण्यास मनाई केली आहे.

स्वराची काळजी घेणाऱ्या या गोड आज्जीची भूमिका ज्येष्ठ अभिनेत्री कांचन गुप्ते यांनी साकारली आहे. कांचन गुप्ते या स्टेट बँकेत नोकरी करत पण अभिनयाची आवड त्यांना स्वस्थ बसू देत नव्हती. कांचन गुप्ते यांनी रंगभूमीवरून आपल्या अभिनयाच्या कारकिर्दीला सुरुवात केली होती. नोकरी सांभाळून नाटकातून काम करत तारेवरची कसरत सुरू असताना नाटक, चित्रपट आणि मालिकेतून त्या महत्त्वाच्या भूमिकेत झळकल्या. घाडगे अँड सून, माझ्या नवऱ्याची बायको, जावई विकत घेणे आहे अशा मालिकेत त्या चरित्र अभिनेत्रीच्या भूमिका  साकारताना दिसल्या. झी मराठीवरील माझ्या नवऱ्याची बायको या मालिकेने जवळपास ५ वर्ष प्रेक्षकांच्या मनावर अधिराज्य गाजवलं. या मालिकेत कांचन गुप्ते यांनी महाजनी काकूंची भूमिका गाजवली होती.

माझ्या नवऱ्याची बायको मालिकेने सर्वच कलाकारांना चांगली लोकप्रियता मिळवून दिली होती. कांचन गुप्ते यांनी आजवर बहुतेक मालिकांमधून सकारात्मक भूमिका साकारल्या आहेत, त्यामुळे त्यांच्या भूमिकांना प्रेक्षकांनी नेहमीच पसंती दर्शवली आहे. कांचन गुप्ते यांच्याच पावलावर पाऊल टाकत त्यांची मुलगी पूर्वा गोखले ही देखील अभिनय क्षेत्रात दाखल झाली. पूर्वा गोखले ही मराठी तसेच हिंदी सृष्टीतील लोकप्रिय अभिनेत्री म्हणून ओळखली जाते. तुझसे है राबता या हिंदी मालिकेने पूर्वाला मोठी लोकप्रियता मिळवून दिली होती. मराठी मालिकेची नायिका ते हिंदी मालिका सृष्टीत चरित्र अभिनेत्री अशी तिने स्वतःची एक ओळख बनवली आहे. खरं तर पूर्वाने मराठी मालिकेतून काम केल्यानंतर हिंदी मालिकेकडे आपली पाऊले वळवली.

कहानी घर घर की, कोई दिल में है, तुझसे है राबता अशा हिंदी मालिकांमधून पूर्वाला महत्वाच्या भूमिका मिळत गेल्या. कुलवधू ही तिने साकारलेली पहिली मराठी मालिका. २००७ सालच्या कुलवधू या मालिकेत पूर्वाने देवयानीची भूमिका साकारली होती. या मालिकेमुळे तिला मोठी लोकप्रियता मिळाली. स्वराज्यरक्षक संभाजी, कुलवधू, भयभीत अशा मालिका आणि चित्रपटांमधून अभिनेत्री पूर्वा गोखले हिने महत्वपूर्ण भूमिका साकारल्या. जवळपास १३ वर्षानंतर भयभीत चित्रपटातून ती सुबोध भावे सोबत पुन्हा एकदा झळकली होती. पूर्वा ही केदार गोखले सोबत विवाहबद्ध झाली. केदार बिजनेसमन आहे, अनुष्का आणि काशवी या त्यांच्या दोन लेकी आहेत.