सोशल मीडियावर “काचा बदाम” हे गाणं होतंय सुपरहिट.. कोणी गायलं हे गाणं?

सोशल मीडिया हे असं माध्यम आहे ज्यातून अनेक कलाकारांना आणि गरजूंना फायदा झालेला आहे. अगदी राणू मंडल असो वा बचपन का प्यार म्हणणारा सहदेव असो या सर्वांना सोशल मीडियाच्या माध्यमातून तुफान लोकप्रियता मिळाली आहे. सध्या सोशल मीडियावर आणखी एक गाणं सुपरहिट होताना दिसत आहे. या गाण्याची भुरळ अगदी सेलिब्रिटींना देखील झालेली पाहायला मिळत आहे. “काचा बदाम” हे एका बंगाली माणसानं गायलेलं गाणं रिमिक्स करण्यात आलं आहे. आणि त्यावर अनेकांनी डान्सचे रिल्स बनवले आहेत. काचा बदाम हे गाणं गायलं आहे पश्चिम बंगाल मधील भुवन बादयाकर या व्यक्तीने.

भुवनचा एक छोटासा व्यवसाय आहे तो आपल्या दोन चाकी गाडीवरून आसपासच्या परिसरात बदाम म्हणजेच भुईमुगाच्या शेंगा विकतो. या शेंगा विकत असताना त्याने अनोख्या अंदाजातून गाणं गाऊन सगळ्यांचे लक्ष्य वेधून घेतले आहे. आपल्या गाण्यातील प्रत्येक ओळीत तो काचा बदामचा आवर्जून उल्लेख करताना दिसतो. खरं तर भुवनचा हा व्हिडीओ खूप जुना आहे. एकदा सहज म्हणून त्याचा गातानाचा एक व्हिडिओ काढण्यात आला होता. त्यानंतर हा व्हिडीओ सोशल मीडियावर खूप मोठ्या प्रमाणात व्हायरल झाला. अनेक संगीतकारांनी भुवनच्या ह्या गाण्याला संगीतबद्ध करण्याचा छोटासा प्रयत्न केला. आता हे रिमिक्स गाणं भल्याभल्याना नाचायला लावत आहे.

केवळ भारतातच नव्हे तर या गाण्याची भुरळ परदेशी नागरिकांना देखील पडलेली पाहायला मिळत आहे.अगदी जेट मध्ये देखील हवाई सुंदरीने काचा बदाम या गाण्यावर ठेका धरलेला पाहायला मिळतो आहे. मराठी सेलिब्रिटींनी देखील काचा बदाम गाण्यावर ठेका धरत रिल्स बनवले आहेत. त्यामुळे हे गाणं सध्या सोशल मीडियावर तुफान ट्रेंडमध्ये आलेलं पाहायला मिळत आहे. भुवनला या गाण्यामुळे लोकप्रियता मिळाली आहे आणि त्याच्या चालत्या फिरत्या स्टॉलवर लोकांची गर्दी देखील पाहायला मिळत आहे. अर्थात त्याच्या गाण्याची ही हटके स्टाईल लोकांना प्रचंड आवडली असली तरी या गाण्याच्या रिमक्समधून त्याला आर्थिक फायदा व्हावा अशी माफक अपेक्षा आहे.

कारण हे गाणं गाताना तो ज्या पोटतिडकीने ग्राहकांचे लक्ष्य वेधून घेतोय हे त्याच्याकडे पाहूनच समजते. अगदी साध्यासुध्या कपड्यात दिसणारा भुवन केवळ पोटाची खळगी भरण्यासाठीच हा खटाटोप करतोय हे त्याच्या राहणीमानावरूनच तुमच्या लक्षात येईल. अनोख्या अंदाजात गाणे गाऊन प्रसिद्धी मिळवणारे अनेक कलाकार मंडळी फेमस झाली आहेत, त्यातच आता भुवनचे देखील नाव जोडले जात आहे. त्याचा असाच गातानाचा आणखी एक व्हिडिओ सोशल मीडियावर प्रसिद्धी मिळवत आहे. या प्रसिद्धीचा भुवनला पुरेपूर सदुपयोग व्हावा हीच एक अपेक्षा.