स्टार प्रवाह वरील ही मालिका घेणार प्रेक्षकांचा निरोप.. नव्या मालिकेत झळकणार मुलगी झाली हो मधील ही अभिनेत्री

गेल्या काही वर्षांपासून स्टार प्रवाह वाहिनी टीआरपीच्या स्पर्धेत प्रथम क्रमांकावर तग धरून आहे. या वाहिनीवरील ठरलं तर मग या मालिकेने अल्पावधीतच प्रेक्षकांच्या मनाचा ठाव घेत नंबर एकच्या यादीत प्रवेश मिळवला आहे. गेल्या ७ आठवड्यापासून ही मालिका प्रथम क्रमांकावर आली असल्याचे दिसून येते. वाहिनीवर लवकरच आणखी एक मालिका प्रसारित होत आहे. या नव्या मालिकेचे नाव आहे मन धागा धागा जोडते नवा. या नव्या मालिकेचा पहिला प्रोमो नुकताच प्रेक्षकांच्या भेटीला आला आहे. अभिनेत्री दिव्या पुगावकर ही पुन्हा एकदा प्रमुख भूमिका साकारताना दिसत आहे.

लग्नानंतर नवऱ्यापासून वेगळं राहणारी नायिका जेव्हा पुन्हा तिच्या माहेरी राहायला जाते तेव्हा तिला अनेक अडचणींचा सामना करावा लागतो. आपण या घरात ओझं बनून राहतोय याची पदोपदी आठवण करून दिली जाते. असेच एक कथानक मालिकेत दाखवण्याचा प्रयत्न केला आहे. त्यामुळे मालिकेचे स्वागत प्रेक्षकांनी करण्यास सुरुवात केली आहे. मन धागा धागा जोडते नवा ही मालिका ८ मे पासून संध्याकाळी ६.३० वाजता प्रसारित होणार आहे. त्यामुळे ह्या वेळेत प्रसारित होणारी स्वाभिमान ही मालिका प्रेक्षकांचा निरोप घेत असल्याचे समोर आले आहे. स्वाभिमान शोध अस्तित्वाचा ही मालिका शांतनू आणि पल्लवीच्या प्रेमाची गोष्ट आहे. या मालिकेचा शेवट गोड होऊन निरोप घेत असल्याचे संकेत तुम्हाला येत्या काही भागातून मिळतील.

तूर्तास मन धागा धागा जोडते नवा मालिकेमुळे अभिनेत्री दिव्या सुभाष पुगावकर पुन्हा एकदा प्रेक्षकांच्या भेटीला येत आहे. दिव्या पुगावकर हीने आपल्या करिअरची सुरुवात स्टार प्रवाहवरील प्रेमा तुझा रंग कसा मालिकेतून केली होती. प्रेमा तुझा रंग कसा मालिकेनंतर दिव्या स्टार प्रवाहवरील मुलगी झाली हो मालिकेत माऊची भूमिका साकारताना दिसली. मुक्या माऊने आपल्या सहजसुंदर अभिनयाने प्रेक्षकांची मनं जिंकून घेतली होती. अभिनय आणि मॉडेलिंग यांच्यासोबत दिव्याला डान्सची देखील प्रचंड आवड आहे. मुलगी झाली हो मालिके नंतर आता स्टार प्रवाह वाहिनीने तिला पुन्हा एकदा ही संधी देऊ केली आहे. याही नव्या मालिकेत ती तिच्या अभिनयाने प्रेक्षकांची मनं नक्कीच जिंकून घेणार अशी खात्री आहे.