प्रसिद्ध अभिनेत्याची लगीनघाई.. केळवण, ग्रहमख आणि हळदीला झाली सुरुवात

सध्या मराठी विश्वात कलाकारांची लगीनघाई सुरू झालेली पाहायला मिळत आहे. काही दिवसांपूर्वीच अभिनेता प्रसाद जवादे आणि अमृता देशमुख यांचा लग्नसोहळा पार पडला. त्यापाठोपाठ अभिनेता पियुष रानडे आणि सुरुची अडारकर यांनी लग्नगाठ बांधून सगळ्यांना आश्चर्याचा धक्का दिला. तर अभिनेत्री पूजा सावंत ही देखील सिद्धेश चव्हाण सोबत जानेवारी महिन्यात लग्न करेल असे तिने नुकत्याच दिलेल्या एका मुलाखतीत सांगितले आहे. यासोबतच लिटिल चॅम्प्स फेम मुग्धा वैशंपायण आणि प्रथमेश लघाटे यांच्याही लग्नाची लगबग सुरू झालेली आहे. तर स्टार प्रवाहवरील लक्ष्मीच्या पावलांनी मालिका फेम अभिनेता ध्रुव दातार लवकरच विवाहबद्ध होत आहे.

लक्ष्मीच्या पावलांनी मालिकेत ध्रुव दातार नायकाच्या भावाच्या भूमिकेत झळकला आहे. राहुलची भूमिका तो या मालिकेत साकारत आहे. लग्नाच्या लगबगीमुळे ध्रुवने मालिकेतून काही दिवसांचा ब्रेक घेतला आहे. दोन दिवसांपासून ध्रुवच्या घरी त्याच्या लग्नाची लगबग सुरू झाली आहे. नुकतेच ध्रुवच्या जवळच्या नातलगांनी त्याचे केळवण साजरे केले. मेंदी सोहळा, ग्रहमख पूजनानंतर आज त्याची हळद पार पडत आहे. संगीत सोहळा आणि त्यानंतर लग्नाचा थाट सजलेला पाहायला मिळणार आहे. ध्रुव दातार हा कोरिओग्राफर असलेल्या अक्षता तिखे सोबत लग्नगाठ बांधत आहे. मे महिन्यात या दोघांचा साखरपुडा संपन्न झाला होता. त्यानंतर लग्नाला त्यांनी पुरेसा वेळ घेतलेला पाहायला मिळतो आहे. दरम्यान ध्रुव दातार काही प्रोजेक्ट मधून प्रेक्षकांच्या भेटीला येत राहिला.

कॉलेजमध्ये असल्यापासूनच ध्रुवला मॉडेलिंगचे वेध लागले होते. तर अक्षता देखील नृत्यांगना असल्याने तिने स्वतःचे क्लासेस घेण्यास सुरुवात केली होती. यादरम्यान ध्रुवला मालिका क्षेत्रात येण्याची संधी मिळाली. अभिनयाचे कुठलेही धडे न गिरवता ध्रुव झी मराठीच्या तू चाल पुढं मालिकेत पहिल्यांदा झळकला. सध्या तो स्टार प्रवाहवरील लक्ष्मीच्या पावलांनी मालिकेतून सहाय्यक भूमिकेत पाहायला मिळत आहे. पण लग्नाच्या लगबगीमुळे तो मालिकेतून ब्रेक घेताना दिसतो आहे. मेंदी सोहळा आणि हळदीच्या सोहळ्यानंतर आज संगीत सोहळा आणि लग्नाचा सोहळा पार पडत आहे. मेंदी सोहळ्यात अक्षताने त्यांच्या २०१९ पासूनच्या आठवणी हातावर रेखाटल्या आहेत. तिची ही हटके मेंदी सगळ्यांचे लक्ष वेधून घेत आहे. दोघेही हळदी सोहळ्यात साध्याच पोशाखात पाहायला मिळाले. पण आज पार पडणाऱ्या लग्नसोहळ्यात त्यांचा थाट कसा असेल याची जास्त उत्सुकता आहे. ध्रुव दातार आणि अक्षता तिखे यांना आयुष्याच्या या नवीन वाटचालीसाठी खूप खूप शुभेच्छा.