ढेऱ्या , ढुंग्या आणि कबीरच्या आयुष्यात येणार ही पोरगी.. बॉईज ३ च्या टीझरने लावली आग

आम्ही लग्नाळू म्हणत बॉईज सिनेमाच्या पहिल्या दोन सीझनमध्ये धुमाकूळ घालणाऱ्या त्या तीन पोरांच्या आयुष्यात येणाऱ्या नव्या पोरीचा चेहरा समोर आला आहे. नुकताच बॉईज ३ या सिनेमाचा टीझर प्रदर्शित झाला असून विदुला चौगुलेही धुरळा उडवायला तयार झाली आहे. टीझरवर प्रेक्षकांच्या उड्या पडल्याने बॉईज ३ कधी एकदा पडद्यावर येतोय याची उत्सुकता आहे. शालेय वयातील मुलामुलींचं एकमेकांविषयीचं आकर्षण, प्रेम याची भन्नाट भट्टी जमलेल्या बॉईज सिनेमाच्या पहिल्या दोन सीझननी बॉक्स ऑफीसवर धिंगाणा घातला होता. काही दिवसांपूर्वी जेव्हा बॉईज ३ सिनेमाची घोषणा झाली तेव्हा अर्धा चेहरा झाकलेली ती पोरगी कोण असेल याची खूप चर्चा रंगली होती.

आता हे सत्य विदुलाच्या रूपाने समोर आलं आहे. पण एका पोरीच्या मागे तीन पोरं असा मसाला खच्चून भरलेल्या या सिनेमात पोरगी नेमकी कुणाला मिळणार याची उत्सुकता मात्र अजूनही आहेच. विदुला बॉईज ३ च्या निमित्ताने मराठी सिनेमात पदार्पण करणार आहे. यापूर्वी विदुलाने अनेक नाटकांमध्ये काम केलं असून तिची जीव झाला येडा पिसा ही मालिका खूप गाजली होती. यात तिने सोज्वळ सिध्दीची भूमिका केली होती. पण आता बॉईज ३ मध्ये विदुला वेड लावेल इतकी हॉट दिसत आहे. बॉईज सिनेमातील तीनही पोरांची हिरोईन कोण याची चर्चा विदुलाने थांबवली आहे. ढेऱ्या, ढुंग्या आणि कबीर यांच्यातील दोस्तीने प्रेक्षकांच्या मनावर गारूड केलं.

या त्रिकुटाच्या आयुष्यात येणारी पोरगी यावर सिनेमाच्या दोन्ही सीझनमध्ये मनोरंजनाचं शिखर गाठलं. आता लवकरच बॉईज ३ पडद्यावर येणार आहे. नुकताच या सिनेमाचा टीझर प्रदर्शित झाला आणि नव्या पोरीची एन्ट्री झाली. आम्ही लग्नाळू म्हणत ढेऱ्या, ढुंग्या आणि कबीर पोरीच्या मागे तर लागणार आहेतच. या पोरीमुळे बॉईजच्या आयुष्यात काय खळबळ उडणार याचा धमाका सिनेमात पाहण्यातच मजा आहे. प्रतीक लाड, पार्थ भालेराव आणि सुमंत शिंदे यांनी बॉईजच्या दोन्ही सीझनमध्ये धमाल केली आहे. रितिका श्रोत्रीने पहिल्या सीझनमध्ये ढुंग्यासोबत केलेली मस्ती प्रेक्षकांच्या अजूनही लक्षात आहे. कबीरच्या आयुष्यातील वादळ तिसऱ्या सीझनमध्ये कसं असेल हे पाहण्यासाठी चाहते आतूर आहेत.