प्रेग्नंन्ट असल्याच्या चर्चेवर सोनालीने दिले उत्तर

सोनाली कुलकर्णी, हेमांगी कवी, भरत जाधव, सिद्धार्थ जाधव, सचित पाटील, नागेश भोसले अशी भली मोठी स्टार कास्ट लाभलेला ‘तमाशा Live’ हा चित्रपट १५ जुलै रोजी प्रदर्शित झाला. या चित्रपटाच्या प्रमोशनसाठी सिद्धार्थ जाधव आणि सोनाली कुलकर्णी यांनी खटाटोप केलेला पाहायला मिळाला. गेल्या चार ते पाच दिवसात या चित्रपटाला प्रेक्षकांनी चांगला प्रतिसाद दिला आहे. तमाशा लाईव्ह हा बिग बजेट मुव्ही नसला तरी चित्रपटाच्या प्रमोशनसाठी मात्र बराच खर्च केलेला पाहायला मिळाला. सोनाली कुलकर्णीचा नवरा कुणाल बेनोडेकर यानेही चित्रपटाच्या प्रमोशनला हजेरी लावली होती.

कुणाल सोबत सोनालीने एक फोटो शेअर केला होता. फोटोसोबत तिने चित्रपटाला प्रेक्षकांचा भरभरून प्रतिसाद मिळाल्याबद्दल मीडियाचे आणि चाहत्यांचे आभार मानले होते. सोनालीने जो ड्रेस घातला होता त्यावरून ती प्रेग्नंट असल्याच्या चर्चांना उधाण आलेले पाहायला मिळाले होते. बॉलिवूड सृष्टीला हा ड्रेस आता चांगलाच परिचयाचा झाला आहे. त्यामुळे कोणत्याही नायिकेने असा ड्रेस परिधान करताच ती प्रेग्नंन्ट असल्याचे म्हटले जाते. अनुष्का शर्मा हिने असाच एक ट्रेंड सुरू करून दिला होता. याच कारणावरून सोनाली प्रेग्नंन्ट आहे असे गृहीत धरले जाऊ लागले. मात्र या चर्चेला सोनालीने पूर्णविराम दिलेला पाहायला मिळतो आहे. सोनालीने त्याच पोस्टवर एक कमेंट केली आहे.

सोनाली म्हणते की, ‘जे कोणी मला गुड न्यूज बद्दल विचारत आहेत, त्यांना मी सांगू इच्छिते की मी प्रेग्नंट नाहीये. मी फक्त माझ्या तमाशा लाईव्ह चित्रपटासाठी स्वप्नवत कामगिरी पार पाडली आहे’. सोनालीच्या या उत्तरामुळे तिच्या प्रेग्नेंट असल्याच्या चर्चांना पूर्णविराम मिळालेला आहे. काही दिवसांपूर्वीच लंडन येथे सोनालीने कुणाल सोबत दुसऱ्यांदा मोठ्या थाटात लग्न केले होते. मात्र लग्नाचे फोटो योग्य वेळी पोस्ट करणार असे तिने जाहीर केले होते. एका पाठोपाठ एक येणाऱ्या चित्रपटाच्या व्यस्त शेड्युलमधून वेळ काढून तिने कुणाल सोबत परदेशात ट्रिप एन्जॉय केली होती. त्यामुळे ह्या चर्चा सेलिब्रिटींच्या आयुष्यात कायम घडतच असतात.